HamkorBank ортидан «Ипак йўли» банки ҳам «Сбербанк» билан ўтказмаларни тўхтатди
Офис банкларида Western Union, MoneyGram va «Золотая Корона» тизимлари одатдагидек тартибда фаолият кўрсатмоқда.
Техник сабабларга кўра «Ипак йўли» банки орқали Unistream пул ўтказмаларини жўнатиш ва қабул қилиш ҳамда «Сбербанк Онлайн» орқали жўнатилган ўтказмаларни банк карталарига кирим қилиш вақтинча тўхтатилди. Бу ҳақда банк матбуот хизмати хабар берди.
«Ҳурматли мижозлар! Техник сабабларга кўра ‘Ипак Йўли’ банки орқали Unistream пул ўтказмаларини жўнатиш ва қабул қилиш вақтинча тўхтатилди
Офис банкларида Western Union, MoneyGram va ‘Золотая Корона’ тизимлари одатдагидек тартибда фаолият кўрсатмоқда», дейилади хабарда.
Шунингдек, «Сбербанк Онлайн» орқали жўнатилган ўтказмаларни банк карталарига кирим қилиш ҳам вақтинча тўхтатилган.
«Хизматлар қайта тикланиши ҳақида қўшимча хабар берамиз. Тўғри тушунасиз деган умиддамиз», дейилади хабарда.
Аввалроқ HamkorBank санкция остида қолган «Сбербанк» билан ўтказмаларни тўхтатгани хабар қилинганди.
Қайд этиш керакки, «Сбербанк», «Райффайзенбанк», ВТБ, «Ростелеком» банкларининг иловалари фаолиятида узилишлар ҳам кузатилган.
Бунга қадар Америка Қўшма Штатлари Россиянинг Украинадаги ҳарбий ҳаракатларига қарши чоралар кўриш мақсадида «Сбербанк», «Газпромбанк», «Открытия» Банклари, «Совкомбанк», «Новикомбанк»га қарши санкциялар киритаётгани ҳамда ушбу чекловлар мамлакат банк секторининг 80 фоизини қамраб олиши хабар қилинганди.
Шунингдек, Европа Иттифоқи Россиянинг Шарқий Европада олиб бораётган ҳарбий ҳаракатлари фонида санкцияларнинг иккинчи пакетини эълон қилди. Унга кўра, янги чекловлар Россия банк бозори ва муҳим давлат компанияларининг 70 фоизига таъсир қилади, нефтни қайта ишлаш заводларини модернизация қилишни ва самолёт қисмларини етказиб беришни тўхтатади.
