Илон Маск АҚШ расмийларини сўз эркинлигини чеклашга уринишда айблади
Миллиардернинг адвокатлари Маск ҳукуматнинг очиқ танқидчиси бўлиб қолаётгани учун таъқиб қилинаётганини илгари сурди.
Миллиардер Илон Маск АҚШ расмийларини сўз эркинлигини чеклашга уринишда айблади. Бу ҳақда The Verge миллиардер адвокатларининг Манхеттен федерал судига юборган хатига таяниб хабар берди.
Маълум қилинишича, Илон Маск АҚШ Қимматли қоғозлар ва биржалар комиссияси (SEC) ўзига ва компаниясига нисбатан «чексиз» ва «доимий» тергов ўтказаётганидан шикоят қилган. Унинг адвокатлари SEC Маскни «таъқиб қилаётганини» илгари сурган, чунки тадбиркор «ҳукуматнинг очиқ танқидчиси бўлиб қолмоқда».
«SEC’нинг ҳаддан ташқари уринишлари [Маскнинг] ҳуқуқларини чеклашга қаратилганга ўхшайди», дейилади адвокатларнинг мактубда.
Адвокатлар, шунингдек, SEC суд жараёнини ҳал қилиш доирасида Маск ва компаниядан олинган 40 миллион долларни Tesla акциядорларига тўлаш ҳақидаги ваъдасини бажармаганини таъкидлаган. Мактуб SEC’нинг Маскга қарши даъвоси бўйича суд мажлисига раислик қилган судья Элисон Натанга қаратилган.
Қайд этилишича, 2018 йилда SEC миллиардерни Twitter’даги хабар учун судга берган. Маск Tesla инвесторларидан акцияларни 420 доллардан сотиб олиб, компанияни хусусийлаштирмоқчилигини ёзган. SEC бизнесмен бу пости билан Tesla инвесторларини алдаган, деб ҳисоблади. Миллиардер комиссия билан музокаралар олиб бориб, компания директорлар кенгаши раиси лавозимини тарк этишга ва 40 миллион доллар жарима тўлашга рози бўлган.
«Маск ва Tesla SEC билан битим тузиш ниҳоят регулятор томонидан таъқибга чек қўйишига умид қилган эди, аммо бу содир бўлмади», — деб таъкидлаган миллиардернинг адвокатлари.
Маълумотларга кўра, Америка регулятори аллақачон Tesla’ни Маскнинг Twitter’дан фойдаланиши келишув битими шартларини бузаётгани, унга кўра у постларни комиссия келишиб олиши кераклиги ҳақида икки марта огоҳлантирган. Февраль ойи бошида SEC Tesla’га Маскнинг твитлари билан боғлиқ яна бир чақирув қоғозини юборган.
Маскнинг ўзи Twitter’да SEC’ни бир неча бор танқид қилган. 2018 йил 4 октябрдаги нашрида миллиардер бошқарма қисқартмасини Shortseller Enrichment Commission (Шорт-селлерларни бойитиш комиссияси) деб талқин қилган, бу билан регуляторнинг ҳаракатлари Tesla акцияларининг тушишига пул тикувчи инвесторлар фойдасига ишлашини назарда тутган.
Аввалроқ Маскнинг компанияси ҳайвонларга шафқатсиз муносабатда бўлгани ҳақидаги айбловларни рад этгани хабар қилинганди. Шунингдек, Илон Маск Tesla’нинг 5,7 миллиард долларлик акцияларини хайрия қилгани ҳақида хабар берилди.
