Илон Маск янги ижтимоий тармоқ яратиш ҳақида ўйламоқда
Илон Маск ўзининг Twitter саҳифасида сўров ўтказди, обуначиларнинг катта қисми Twitter «сўз эркинлигини ҳурмат қилмаслигини» билдирди.
Tesla ва SpaceX асосчиси Илон Маск ўзининг Twitter саҳифасида ижтимоий тармоқ сўз эркинлиги тамойилига амал қиладими ёки йўқми деган сўров ўтказди.
Фойдаланувчиларнинг аксарияти (70,4 фоиз) салбий жавобини қолдирди, бу эса Маскни янги ижтимоий тармоқ яратиш ҳақида ўйлашга ундади.
«Twitter ҳақиқатда оммавий майдон бўлиб хизмат қилишини ҳисобга олсак, сўз эркинлиги тамойилларига риоя қилмаслик демократияни тубдан бузади», — деди Маск.
Тадбиркор, шунингдек, алоҳида твитида «ушбу сўровнинг натижалари муҳим аҳамият касб этади» дея огоҳлантирди ва обуначиларидан диққат билан овоз беришни сўради.
Якунда атиги 29,6 фоиз респондент Twitter сўз эркинлиги тамойилларини ҳурмат қилишини билдирган. Маск обуначилардан бу вазиятда нима қилиш мумкинлиги ва янги платформа яратиш керакми ёки йўқлигини сўради.
Маскдан айрим ОАВларни блоклаш сўралган
Март ойининг бошида, Маскнинг сўзларига кўра, баъзи мамлакатлар ҳукуматлари унга Россия ахборот манбаларини блокировка қилишни талаб қилган. Украина бу давлатлар қаторида эмас эди.
Тадбиркор ўзининг Starlink тармоғидаги рус ахборот манбаларини блоклашдан бош тортди ва сўз эркинлигини «мутлақлаштираётганини» айтди.
Трампнинг ижтимоий тармоғи
АҚШ собиқ Президенти Дональд Трампнинг жамоаси 21 февраль куни Truth Social дастурини ишга тушириши айтилганди.
Truth Social бета тестерларининг саволларига жавобан, Billy B. тахаллуси билан тасдиқланган аккаунт остидаги ижтимоий тармоқнинг маҳсулотлар бўйича директори шундай деб ёзган:
«Биз ҳозирда дастурни 21 февраль, душанба куни App Store’га жойлашга тайёргарлик кўрмоқдамиз».
Аммо ҳозиргача АҚШнинг собиқ Президентига тегишли тармоқ App Store’да пайдо бўлгани йўқ.