Илон Маскнинг укасига тегишли стартап ўз маҳсулотларини электр велосипедларда етказиб беради
Square Roots стартапи URB-E етказиб бериш хизмати билан ҳамкорлик қилишини эълон қилди.
Илон Маскнинг укаси Кимбал Маскка тегишли Square Roots стартапи ўз маҳсулотларини электр велосипедларда етказиб беришни йўлга қўяди. Бу ҳақда Progressive Grocer хабар берди.
Маълум қилинишича, Square Roots стартапи URB-E етказиб бериш хизмати билан ҳамкорлик қилишини эълон қилган. Логистика компанияси Нью-Йорклик чакана сотувчиларга товарларни етказиб бериш учун ўзининг электр велосипедлари паркини тақдим этади.
«Маҳаллий фермерлар билан янги етиштирилган маҳсулотларни етказиб бериш билан бир қаторда зарарли эмиссияларни электр велосипедларимиздан фойдаланиш орқали камайтириш келажакнинг тоза ва ақлли шаҳарларини қуришнинг бир қисми деб аташ мумкин. Шунинг учун биз Square Roots билан ҳамкорлик қилишдан хурсандмиз», — дейди Лос-Анжелесда жойлашган URB-E омпанияси бош директори Чарльз Жолли.
Унинг қўшимча қилишича, электр велосипедлардан фойдаланиш нафақат автомобиль йўлларини озод қилади, балки одамларга йил давомида янги озиқ-овқат олиш имкониятини ҳам беради.
Square Roots’нинг «ақлли ферма» технологик платформаси ва дастур билан бошқариладиган гидропоник етиштириш тизимлари компанияга ташқаридаги об-ҳаводан қатъи назар йилига 365 кун оз ресурслар билан кўпроқ озиқ-овқат етиштириш имконини беради. Компания одатдаги дала фермаларига қараганда 95 фоиз камроқ сув ишлатади, шунингдек, қайта жиҳозланган ва қайта ишланган юк ташиш контейнерларида оптимал иқлим яратиш учун шаҳар инфратузилмасидан фойдаланади.
Маълумот ўрнида, Square Roots 2016 йилда тадбиркорлар Кимбал Маск ва Тобиас Пеггс томонидан асос солинган. Стартап бутун мамлакат бўйлаб Whole Foods Market, FreshDirect, Morton Williams каби 250 дан ортиқ савдо нуқталарида сарҳил маҳсулотлар ассортиментини таклиф этади.
Кичик Маскнинг Square Roots стартапи ўсимликларни махсус идишларда ўстиради: минимал ёруғлик ва сув қабул қилган ҳолда улар ҳосил беради. Бунинг ёрдамида йил давомида ҳар қандай жойда озиқ-овқат этиштириш мумкин.
Аввалроқ Илон Маскнинг укаси Кимбал Маск компания 1,5 миллиард долларлик криптовалюта сотиб олишини эълон қилганида биткоин қазиб олишнинг атроф-муҳитга таъсиридан бехабар бўлганини айтгани хабар қилинганди.