Intel биткоин майнинги учун оддий процессорлардан 1000 баравар кучли бўлган чип яратди. Бу ҳақда Reuters хабар бермоқда.

Қайд этилишича, Intel’нинг график процессорлар бўлими бошлиғи ва катта вице-президенти Ража Кодури компания 2022 йилда криптовалюта «қазиб олиш» учун махсус Bonanza Mine процессорини чиқаришини маълум қилган.

Чип 2022 йил охирида етказиб берилади. Intel’нинг дастлабки мижозлари орасида Twitter’нинг собиқ бош директори Жек Дорси Block (собиқ Square), шунингдек, Argo Blockchain ва GRIID Infrastructure майнинг компаниялари бор.

Intel ҳали янги чипнинг техник хусусиятларини ошкор қилмаган, у ҳақида батафсил маълумот 23 февраль куни ISSCC (Халқаро қаттиқ жисмли схемалар конференцияси)да тақдим этилади. Бироқ, раҳбар Кодурининг таъкидлашича, унинг ҳар бир ваттга ишлаши SHA-256 алгоритмига асосланган анъанавий майнинг процессорларидан 1000 баравар юқоридир.

Таъкидланишича, Intel’нинг чипи катта ҳисоблаш қувватини талаб қилувчи ва шунинг учун кўп энергия сарфлайдиган блокчейн вазифаларини қайта ишлашни тезлаштириш учун мўлжалланган энергия тежовчи «тезлаткичдир».

«Чип архитектураси майда кремний бўлагида амалга оширилган, шунинг учун уни ишлаб чиқариш жорий маҳсулотларни етказиб беришга минимал таъсир кўрсатади», дейилади компания хабарида.

График карталари майнинг учун кенг қўлланиладиган Nvidia чип ишлаб чиқарувчиси Ethereum қазиб олишга мўлжалланган алоҳида чипга эга.

Аввалроқ Twitter асосчисининг тўлов компанияси биткоин «қазиб олиш» тизимини яратиши хабар қилинганди. Шунингдек, америкалик эркак Tesla’да криптовалюта «қазиб олиш»ни бошлагани ҳақида хабар берилди.