Италия бош вазири Россияга қарши санкциялар узоқ вақт давом этишини айтди
Марио Драгига кўра, иқтисодиёт санкцияларга тайёр бўлиши керак.
Италия бош вазири Марио Драги Россияга қарши санкциялар узоқ вақт давом этишини маълум қилди. Бу ҳақда «РИА Новости» хабар берди.
Италия бош вазири Марио Драгининг айтишича, Украинадаги вазият кескинлашуви муносабати билан Россияга қарши Ғарб санкциялари узоқ давом этади. Иқтисодиёт уларга тайёр бўлиши керак, дея ҳисоблайди бош вазир.
«Бу санкциялар узоқ давом этади. Санкцияларнинг мустаҳкам бўлиши уларни амалга ошириш имкониятига боғлиқ. Биз барча иттифоқчилар билан келишилган санкциялар сиёсатимиздан чекиниш ниятимиз йўқ, шу билан бирга, улар бизнинг ички сиёсатимизга мос келиши учун ҳамма нарсани қилишимиз керак», — деди Драги Италия парламенти Депутатлар палатасида парламент аъзоларининг саволларига жавоб берар экан.
Унинг сўзларига кўра, Италия расмийлари ҳали оқибатларни таҳлил қилиши керак. Гап инфляциянинг ўсиши ва ўсиш суръатларининг секинлашиши ҳақида кетмоқда.
«Биз оилаларнинг харид қобилиятини ҳимоя қилиш ва компанияларни қўллаб-қувватлаш учун барча чораларни кўришга тайёрмиз», — деди бош вазир.
Аввалроқ Италияда Россиянинг энг бой миллиардерига тегишли яхта қўлга олингани хабар қилинганди. Шунингдек, Европа иттифоқи яна 160 нафар россияликка қарши санкциялар эълон қилгани ҳақида хабар берилди.
