Италия ҳукумати Россиянинг энг бой тадбиркори Алексей Мордашовга тегишли яхтани ҳибсга олди. Бу ҳақда Италия бош вазири Марио Драгининг медиа маслаҳатчиси Фердинандо Жульяно Twitter саҳифасида маълум қилди.

Жульянонинг сўзларига кўра, полиция Империя шаҳрида тўхтаб турган Lady M яхтасини «Европа Иттифоқининг яқинда киритган санкцияларига мувофиқ» қўлга олган. Қайд этилишича, кема март ойи бошидан буён шаҳарда бўлган.

Lady M сузиш ҳавзаси ва вертолёт майдончаси билан жиҳозланган 64 метрли суперяхтадир. Уч қаватли кемада олтита икки кишилик меҳмон кабинаси ва 14 экипаж аъзоси учун еттита икки кишилик кабина мавжуд. У Palmer Johnson кемасозлик заводи томонидан қурилган ва АҚШда қурилган энг катта алюминий яхта ҳисобланади.

Шунингдек, 2021 йилнинг октябрь ойида Мордашов Lady M’ни сотишга қарор қилгани айтилганди. Миллиардер 142 метрлик Nord суперяхтасини олганидан кейин қайиқ билан хайрлашишга қарор қилган. Yacht Harbour асосчиси Дмитрий Семенихинга кўра, Lady M’нинг сотувдаги тахминий нархи 30–35 миллион долларни ташкил қилади.

Алексей Мордашов 28 февраль куни биринчи марта Россиянинг Украинага бостириб кириши туфайли ЕИ томонидан киритилган санкцияларга дуч келганди. Мордашов нима учун унга нисбатан чекловлар қўйилганини тушунмаслигини айтган.

«Ҳозирги геосиёсий тарангликка менинг мутлақо алоқам йўқ. Украинада содир бўлаётган воқеалар икки қардош халқнинг фожиаси», — деган миллиардер.

Аввалроқ Германия Алишер Усмоновга тегишли 600 миллион долларлик яхтани мусодара қилгани ҳақида хабар берилганди. Шунингдек, АҚШ Алишер Усмоновнинг активларини блокдан чиқаргани хабар қилинди.