Фонд бозорларидаги пасайиш туфайли дунёдаги энг бой 10 нафар миллиардернинг умумий бойлиги 37,1 миллиард долларга камайди. Буни реал вақт режимида янгиланадиган Forbes Real-Time рейтинги маълумотлари тасдиқлайди.

Қуйидаги информациялар 26 ноябрь куни савдолар ёпилишидаги маълумотларга асосланади:

• Tesla ва SpaceX асосчиси Илон Маск: минус 7,9 миллиард доллар, бойлиги — 282,4 миллиард доллар;
• Amazon асосчиси Жефф Безос: минус 3,8 миллиард доллар, соф бойлиги — 201,6 миллиард доллар;
• Louis Vuitton ва Dior эгаси Арно Бернард: минус 9 миллиард доллар, бойлиги — 189,4 миллиард доллар;
• Microsoft асосчиси Билл Гейтс: минус 2,1 миллиард доллар, бойлиги — 137,4 миллиард доллар;
• Oracle асосчиси Ларри Элиссон: минус 1,9 миллиард доллар, бойлиги — 125,6 миллиард доллар;
• Google асосчиларидан бири Ларри Пейж: минус 3,1 миллиард доллар, бойлиги — 121,7 миллиард доллар;
• Facebook асосчиси ва бош директори Марк Цукерберг: минус 2,8 миллиард доллар, бойлиги — 119,2 миллиард доллар;
• Google асосчиларидан бири Сергей Брин: минус 3 миллиард доллар, бойлиги — 117,3 миллиард доллар;
• Microsoft компаниясининг собиқ бош директори Стив Балмер: минус 2,2 миллиард доллар, бойлиги — 104,1 миллиард доллар;
• Инвестор Уоррен Баффет: минус 1,3 миллиард доллар, бойлиги — 103,2 миллиард доллар.

Америка фонд бозори учун 26 ноябрь бир йил ичидаги энг ёмон кун бўлди. Коронавируснинг янги штамми топилганидан кейин инвесторлар активларни сотишни бошлади. Dow Jones Industrial Average кун давомида 2,5 фоиз ёки 905,04 пунктга тушиб кетди. Бу — 2020 йил октябрь ойидан бери индекснинг бир кунлик энг катта пасайиш.

S&P 500 2,3 фоиз ёки 106,84 пунктга, Nasdaq Composite эса 2,2 фоиз ёки 353,57 пунктга тушди. The Wall Street Journal’нинг ёзишича, бу учта индекс учун рекорд даражадаги энг ёмон «қора жума »сессияси бўлди. Brent нефти нархи 26 ноябрь, жума куни 10 фоиздан кўпроқ тушиб, сентябрдан бери биринчи марта ёпилиш чоғида бир баррель учун 73 доллардан пастга тушди.