JPMorgan метаоламда ваколатхона очган биринчи банк бўлди. Бу ҳақда Bloomberg хабар берди.

Маълум қилинишича, JPMorgan метаоламда ўз ваколатхонасини очган биринчи йирик банкдир. Виртуал залда ташриф буюрувчиларни банк бош директори Жейми Даймоннинг рақамли портрети ва юраётган йўлбарс кутиб олади.

Виртуал объект Digital Currency Group томонидан қўллаб-қувватланадиган ва блокчейн технологиясига асосланган Decentraland метаоламидаги Metajuku савдо марказида жойлашган. Decentraland фойдаланувчиларга ўзининг MANA валютаси билан метаоламни ўрганиш, аватарларни яратиш ва товарларни, шу жумладан ер майдони сотиб олиш имконини беради.

Банк виртуал кутиш залини метаолам сегменти молиявий ҳисоботи билан бирга тақдим этган.

«Метаолам келгуси йилларда ҳар қандай соҳага кириб бориши мумкин, бозор имкониятларининг йиллик даромади 1 триллион доллардан ошади», дейилади ҳисоботда.

Банк виртуал товарларга сарфланган маблағ йилига 54 миллиард долларга етганини таъкидлаган. 2021 йили олти ойлик даврда метаоламдаги ер майдонининг ўртача нархи июнь ойидаги 6000 доллардан декабрга келиб 12 минг долларгача, яъни икки бараварга кўпайган.

«Метаоламга кириш ҳақида ўйлаётган банк мижозлари учун JPMorgan аппарат ҳамёнлари каби тўлиқ ечимларга эга «интеграциялашган тўловлар маркази»ни тақдим этишни режалаштирмоқда», — деган JPMorgan Payments’нинг электрон тижорат ва ТМТ бўйича раҳбари Адит Гадгил.

Таъкидланишича, банк блокчейн технологияси ва уни молиявий операцияларда қўллаш тарафдоридир. Бунга унинг JPM Coin токенини чиқариши далолат беради.

Аввалроқ JPMorgan банки раҳбари 2021 йилда қанча бойлик орттиргани хабар қилинганди. Шунингдек, McDonald’s метаоламда ресторан очиши ҳақида хабар берилди.