Канада 5 нафар россиялик миллиардерга қарши санкциялар киритди
Чекловлар Канада фуқароларига санкцияга учраганлар билан операцияларни амалга оширишни тақиқлайди.
Канада Россияга нисбатан санкциялар рўйхатини яна тўққиз нафар шахс, жумладан беш нафар россиялик миллиардер билан кенгайтирди. Бу ҳақда мамлакат ҳукуматининг веб-сайтида эълон қилинган ҳужжатда айтилади.
Санкциялар миллиардерлар Владимир Потанин («Норникель»раҳбари), Виктор Вексельберг («Ренова» гуруҳи асосчиси), Леонид Михельсон («Новатэк» раҳбари), Дмитрий Пумпянский (ТМК директорлар кенгаши раиси ва собиқ бенефициари) ва Вадим Мошковичга («Русагро» директорлар кенгаши раиси) нисбатан қўлланган.
Шунингдек, санкция рўйхатига Forbes рўйхати аъзоси Кирилл Шамалов («Сибур» акциядори), Александр Винокуров («Марафон групп» президенти, Россия ташқи ишлар вазири Сергей Лавровнинг куёви), Пумпянскийнинг рафиқаси Галина Пумпянская ва Россия Қуролли Кучлари Бош штаби раҳбари, адмирал Игорm Костюков киритилган.
«Чекловлар ҳар қандай Канада фуқаросига санкциялар рўйхатидаги шахсларнинг мол-мулки билан ҳар қандай операцияларни амалга оширишни, молиялаштиришни, нефть ва нефть маҳсулотлари билан операцияларни амалга оширишни ва ҳоказоларни тақиқлайди», дейилади Канада ҳукумати ҳужжатида.
Қайд этиш керакки, Канада бош вазири Жастин Трюдо Украинада уруш бошланганидан сўнг дарҳол Россияга қарши санкцияларни эълон қилди. У 58 нафар шахс ва ташкилотга, жумладан, Россия элитаси вакиллари ва уларнинг оила аъзолари, Россиянинг энг йирик банклари, Россия Хавфсизлик кенгаши аъзоларига нисбатан чекловлар жорий этишга ваъда берди.
Шунингдек, 1 март куни Toronto Star газетаси Россия Президенти Владимир Путин, бош вазир Михаил Мишустин, Россия ташқи ишлар вазири Сергей Лавров, молия вазири Антон Силуанов ва мудофаа вазири Сергей Шойгуга нисбатан санкциялар жорий этилгани ҳақида хабар берди.
Бундан ташқари, 11 март куни миллиардерлар Роман Абрамович ва Алишер Усмонов Канаданинг санкциялар рўйхатига киритилди. 15 март куни Оттава санкциялар рўйхатини россиялик ҳарбийлар, Федерал хавфсизлик хизмати, Фавқулодда вазиятлар вазирлиги ва Иқтисодий ривожланиш вазирлиги раҳбарлари, шунингдек, бош вазир ўринбосари Дмитрий Григоренкони қўшиб кенгайтирди. Март ойи охирида Россия Федерация Кенгашининг 160 аъзоси Канада санкцияларига учради.
Аввалроқ Канада биринчи бўлиб Россия нефтидан воз кечгани хабар қилинганди. Шунингдек, Россиялик миллиардерларнинг Ғарб санкцияларидан қочишга уринаётгани ҳақида хабар берилди.