Канада Алишер Усмоновга қарши санкциялар киритди
Янги чекловлар Россия Марказий сайлов комиссияси раиси ва мудофаа секторидаги ўнлаб корхоналарни ҳам қамраб олди.
Канада россиялик миллиардер Алишер Усмоновга қарши санкциялар киритди. Бу ҳақда Канада ҳукумати томонидан эълон қилинган тегишли баёнотда сўз боради.
Маълум қилинишича, Канада Россиянинг Украинага ҳужуми туфайли миллиардерлар Алишер Усмонов ва Роман Абрамовичга қарши санкциялар киритган. Санкциялар рўйхатига қуйидаги шахслар ҳам киритилган:
- Россия Марказий сайлов комиссияси раиси Элла Памфилова;
- 2021 йилда мухолифатчи Алексей Навальнийни Германиядан Россияга қайтганидан кейин 30 кунга ҳибсга олган Химки шаҳар суди судьяси Елена Морозова (суд мажлиси полиция бўлимида бўлиб ўтган);
- Россия Ички ишлар вазирлигининг Химки бўйича бошқармаси бошлиғи Игорь Янчук.
Бундан ташқари, Канада бош вазири Жастин Трюдонинг айтишича, чекловлар Россия мудофаа секторининг 32 та ташкилотига ҳам тааллуқлидир.
Аввалроқ АҚШ Алишер Усмоновнинг активларига нисбатан санкцияларни бекор қилганди. Шунингдек, Япония Алишер Усмонов ва Рамзан Қодировга нисбатан санкциялар киритгани ҳақида хабар берилди.
