Канада бош вазири Жастин Трюдо мамлакат энди Россиядан нефть харид қилмаслигини эълон қилди. Бу ҳақда Reuters хабар берди.

«Канада Украинанинг Россия ҳарбийларига қарши қаҳрамонона мудофаасини қўллаб-қувватлашда давом этади. Биз Россиядан барча нефть импортини тақиқлаш ниятимизни эълон қиламиз, бу саноат Президент Путин ва унинг ‘олигархлари’ учун катта фойда келтирган», — деди Трюдо.

Канада нефть экспорти бўйича дунёда тўртинчи ўринда туради, бу мамлакат учун Россиядан импорт қилинадиган нефтнинг улуши 1 фоиздан кам. 2020–2021 йилларда Канада Россиядан нефть сотиб олмади ва фақат нефть маҳсулотларини импорт қилди — ҳар йили мос равишда 132 миллион доллар ва 277 миллион доллар.

Углеводородларнинг асосий қисми Албертада ишлаб чиқарилади. Ушбу провинция Irving Oil, Suncor Energy, Valero Energy Corp ва Cresta Fund Management компанияларига қарашли шарқий Канада нефтни қайта ишлаш заводларидан узоқда жойлашган.

Шунингдек, Канада «махсус операция» туфайли Россияга қарши жорий қилинган санкцияларга қўшилди. Жумладан, Россияни SWIFT тизимидан узиш ва Россия Марказий банкининг валюта захираларига киришини чеклашни қўллаб-қувватлади.

Бундан ташқари, Трюдо ҳукумат Канаданинг мустақил радио, телевидение ва телекоммуникация регуляторидан Россия ҳомийлигидаги RT каналини тақиқлашни сўраганини маълум қилди. Канадалик операторлар ўз ихтиёри билан RT трансляциясини тўхтатишларини айтди.

Аввалроқ Ғарбнинг йирик нефть компаниялари 41 миллиард долларлик акцияларни қайта сотиб олиши хабар қилинганди. Шунингдек, Россия 36 та мамлакат билан авиақатновларга чеклов ўрнатгани ҳақида хабар берилди.