«Келгусида 200 минг сўмлик банкнот ҳам чиқариш режалаштирилган» — Марказий банк раиси
Нурмаматовнинг таъкидлашича, нақд пул муомаласини ташкил қилишда маълум бир қонуниятлар бор.
Ўзбекистонда 2024 йил 200 минг сўмлик банкнотлар чиқариш режалаштирилган. Бу ҳақда Марказий банк раиси Мамаризо Нурмуротов бошқарувнинг навбатдаги йиғилишида маълум қилди.
Нурмуротовнинг таъкидлашича, нақд пул муомаласини ташкил қилишда маълум бир қонуниятлар бор. Бу қонуниятлар асосида мамлакатда шаклланган ўртача иш ҳақидан келиб чиқиб, банкларнинг банкнота структураси белгиланади.
«Биз шундан келиб чиққан ҳолда келгусида 200 минг сўмлик банкнотни ҳам чиқаришни режалаштирганмиз. Бу билан биргаликда муомаладаги нақд пулни оптималлаштириш жараёнини амалга оширяпмиз», — дейди у.
Раиснинг айтишича, 2017 йил 50 минг сўмлик банкноталар чиқарилганида муомаладаги нақд пуллар сони аҳоли жон бошига 489 тага тўғри келган.
Аввалроқ Ўзбекистонда 2021 йил 22 декабрдан янги кўринишдаги 50 минг ва 100 минг сўмлик банкнотлар чиқарилиши маълум қилинди. Кейинчалик янги кўринишдаги 50 минг ва 100 минг сўмлик банкнотларнинг кўриниши эълон қилинди. Шундан сўнг янги намунадаги 50 минг сўмлик банкнот дизайнида техник хатолик аниқланди.
