Марказий банк омонатлар бўйича бир нечта тижорат банкларига кўрсатма хатлари юборди
Кўрсатмаларга асосан тижорат банклари томонидан хабарлар ўрганиб чиқилгани маълум қилинди.
Ўзбекистон Марказий банки омонатлар ва кредит билан билан боғлиқ муаммолар бўйича 9 та банкка 15 та кўрсатма хати юборди. Бу ҳақда регулятор матбуот хизмати хабар берди.
Маълум қилинишича, 2022 йилнинг иккинчи чорагида:
- фуқаро М.Ю. томонидан омонатга қўйилган пул маблағига фоизлар нотўғри ҳисоблангани;
- фуқаро В.О.нинг омонатга қўйган пул маблағлари қайтариб берилмагани;
- «Ёз ифори» номли омонат шартларига кўра исталганча қўшимча маблағ киритиш имконияти мавжуд бўлса-да, фуқаро А.А. номига расмийлаштирилган омонатга қўшимча маблағ қабул қилинмагани;
- фуқаро Д.Б. томонидан банк мобил иловаси орқали ўтказилган пул маблағи унинг омонат ҳисоб рақамига кирим бўлмагани;
- шунингдек, кредитга кафил бўлган фуқаронинг маълумотлари нотўғри киритилганлиги сабабли мазкур кредитга алоқаси бўлмаган фуқаро М.Ғ.га кредит маблағини тўлаш бўйича банк томонидан талабнома юборилгани каби қоидабузарликларга йўл қўйилгани юзасидан ижтимоий тармоқларда хабарлар жойлаштирилган.
Мазкур ҳолатлардан келиб чиқиб, «Капиталбанк», «Қишлоққурилишбанк», «Алоқабанк», «Халқ банки», «Ҳамкорбанк», «Ўзсаноатқурилишбанк», «Анорбанк», «Асакабанк» ва TBC банкларига хабарларда кўтарилган масалаларни ўрганиб, расмий коммуникация каналлари орқали муносабат билдириши юзасидан 15 та кўрсатма хатлари юборилган.
Кўрсатмаларга асосан тижорат банклари томонидан хабарлар ўрганиб чиқилгани ва аниқланган камчиликлар бартараф этилиб, расмий саҳифалари ва сайтлари орқали истеъмолчиларга тегишли тушунтиришлар берилгани маълум қилинди.
Аввлароқ Марказий банк кредитларга кафил бўлган фуқароларни огоҳлантирганди. Шунингдек, регулятор «Даврбанк»ка нисбатан жарима санкцияси қўллади.