Марказий банк раҳбарияти ХВЖ вакиллари билан Ўзбекистоннинг макроиқтисодий прогнозларини муҳокама қилди
Марказий банк томонидан олиб борилаётган пул-кредит сиёсати кўриб чиқилди
Халқаро валюта жамғармаси делегациясининг Марказий банкка амалга оширган ташрифи чоғида Ўзбекистоннинг макроиқтисодий прогнозлари муҳокама қилинди. Бу ҳақда банк матбуот хизмати хабар берди.
Маълум қилинишича, ХВЖнинг Ўзбекистон бўйича миссияси раҳбари Рон ван Роден бошчилигидаги делегация Марказий банкка ташриф буюриб, банк раҳбарияти билан учрашув ўтказган.
Қайд этилишича, томонлар мамлакатдаги мавжуд макроиқтисодий вазият, банк-молия тизимини ривожлантириш бўйича кўрилаётган чоралар ҳамда Марказий банк томонидан олиб борилаётган пул-кредит сиёсатини муҳокама қилган. Шунингдек, учрашувда Марказий банкнинг келгуси йил учун макроиқтисодий прогнозлари ҳамда глобал миқёсда юзага келиши мумкин бўлган рисклар кўриб чиқилган.
ХВЖ миссияси раҳбари Марказий банк раҳбарияти билан бўлган мулоқотни конструктив ва самарали деб баҳолаган. Унинг сўзларига кўра, пандемияга қарамасдан, Ўзбекистон макроиқтисодий барқарорликни таъминлашда сезиларли натижага эришган.
Аввалроқ Марказий банк ва Жаҳон банки валюта сиёсатини либераллаштириш ишлари натижасини муҳокама қилгани ҳақида хабар берилганди. Шунингдек, Марказий банкнинг макроиқтисодий ривожланиш бўйича 2 та сценарийи хабар қилинди.
