SpaceX’нинг кўп сонли Starlink сунъий йўлдошлари астрономларнинг юқори сифатли тасвирлар олишига ва потенциал хавфли астероидларни қидиришга халақит бермоқда. Бу ҳақда Astrophysical Journal Letters илмий журнали тадқиқотида сўз боради.

Қайд этилишича, тадқиқотчилар Жанубий Калифорниядаги Паломар расадхонаси астрономлари томонидан олинган 300 мингга яқин суратга Starlink сунъий йўлдошларининг таъсирини таҳлил қилган. Шундай қилиб, 2019 йилнинг ноябридан 2021 йилнинг сентябрига қадар шикастланган тасвирлар сони 35 бараварга ошгани қайд этилган. 2019 йилда тасвирларининг 0,5 фоизи зарар кўрган бўлса, ҳозир бу кўрсаткич 20 фоизга етган.

Тадқиқот шуни кўрсатадики, қуёш нурларининг акс эттирилган чизиқлари потенциал хавфли астероидларни қидиришга халақит бериши мумкин. Сунъий йўлдошларни астероид ва кометалар каби табиий объектлардан фарқлаш қийинлашмоқда.

Аввалроқ Илон Маскнинг SpaceX компанияси 2022 йил рекорд даражада кўп ракета учириши хабар қилинганди.

Маълумот учун, ҳозиргача SpaceX 2042 та Starlink сунъий йўлдошини учирган, бироқ уларнинг ҳаммаси ҳам орбитада эмас ва активлаштирилмаган.

Космик парвозлар бўйича таҳлилчи Жонатан Макдауэллнинг ҳисоб-китобларига кўра, 2000 дан ортиқ сунъий йўлдошдан атиги 1495 таси маълум бир орбитада. Шу билан бирга, 15 январь куни Илон Маск Twitter’да1469 сунъий йўлдош фаол эканини, яна 272 таси эса берилган орбиталар томон ҳаракатланаётганини ёзган.