Мелинда Гейтс бойлигини собиқ эри билан асос солинган фондга бермасликка қарор қилди
Эр-хотин ажрашгандан сўнг бирга ишлай олмаса, Мелинда 2023 йилда фондни тарк этишига келишиб олганди.
Мелинда Гейтс 6,1 миллиард долларлик бойлигининг катта қисмини собиқ эри Билл Гейтс билан биргаликда асос солган фондга бермасликка қарор қилди. Бу ҳақда The Wall Street Journal хабар берди.
Маълум қилинишича, Microsoft асосчиларидан бири бўлган Билл Гейтснинг собиқ рафиқаси Мелинда Гейтс ўз бойлигининг катта қисмини (6,1 миллиард доллар) Bill & Melinda Gates Foundation жамғармасига бермасликка қарор қилган. Гейтс пулларини мустақил равишда хайрия ташкилотларига тарқатишни режалаштирмоқда.
Қайд этилишича, 2010 йилда Билл ва Мелинда Гейтс Giving Pledge хайрия лойиҳасига йўллаган қўшма мактубида бойликларининг катта қисмини ушбу жамғармага хайрия қилишга ваъда берган. Бироқ, Мелинда Гейтс бундан воз кечиш тўғрисида 2021 йил охирида, Билл Гейтс билан ажрашганидан сўнг Giving Pledge’га ўзининг биринчи хатини жўнатганида қарор қилган.
Хатда Мелинда Гейтс бойлигининг катта қисмини хайрия ишларига бериш мажбуриятини тасдиқлаган, бироқ бу Билл ва Мелинда Гейтс жамғармасига ўтказилишига аниқлик киритмаган.
«Мен бир кишининг қўлида шунчалик кўп бойлик тўпланишининг бемаънилигини тан оламан ва мен бундай катталикдаги бойлик билан боғлиқ ягона масъулиятли нарса уни иложи борича ўйланган ва самарали тақсимлаш деб ҳисоблайман», — деб ёзган у.
Bill & Melinda Gates Foundation — дунёдаги энг йирик хайрия ташкилотларидан бири бўлиб, 50 миллиард доллардан ортиқ хайрия жамғармасига эга. Билл ва Мелинда Гейтс ташкилот ҳамраислари ҳисобланади. 2021 йил июль ойида улар ажрашгандан кейин бирга ишлай олмасалар, 2023 йилда Мелинда уни тарк этишига келишиб олган. 27 йиллик никоҳдан кейин эр-хотиннинг ажрашиши 2021 йил августида расмийлаштирилган.
Бундан бир ой аввал Билл ва Мелинда жамғармага яна 15 миллиард доллар ўтказган эди. Таъкидланишича, Мелинда жамғармага янги хайриялар қилишини, ҳаттоки маблағнинг катта қисмини бошқа хайрия ташкилотларига ўтказишини истисно этмаган. Улардан бири Pivotal Ventures 2015 йилда Мелинда Гейтс томонидан ишга туширилган. 2019 йилда у гендер тенглигини таъминлаш учун 10 йил давомида ташкилотга 1 миллиард доллар беришни ваъда қилган.
Аввалроқ Билл Гейтс фонди «яшил» технологияларга 15 миллиард доллар сармоя киритиши хабар қилинганди. Шунингдек, Американинг 2022 йилдаги энг сахий миллиардерлари ҳақида хабар берилди.