Mercedes-Benz Россияга автомобиль етказиб беришни тўхтатади
Кўрилган чора янги ахборот эълон қилингунча амал қилади.
Mercedes-Benz автомобилларини Россияга экспорт қилмайди ва мамлакат ичида ишлаб чиқаришни тўхтатади. Бу ҳақда компаниянинг Twitter’даги расмий саҳифаси хабар берди.
Германия автомобиль ишлаб чиқарувчиси Россияга енгил автомобиль ҳам, фургонларни ҳам етказиб бермайди. Мазкур чора янги ахборот эълон қилингунча амал қилади.
Mercedes-Benz ишлаб чиқариш ва ички бозорга маҳсулот етказиб беришни тўхтатган биринчи компания эмас. 1 март куни Американинг Harley-Davidson мотоцикл ишлаб чиқарувчиси Россиядаги фаолиятини тўхтатганини эълон қилганди.
Бундан олдин Volvo, General Motors (Buick, Cadillac, Chevrolet ва GMC маркалари), Volkswagen (Volkswagen, Skoda, Audi, Lamborghini, Bentley ва Ducatiмаркаларини бирлаштиради), Daimler Truck ва Scania ҳам шу қарорга келганди.
Шунингдек, 2 март куни Toyota Motor ҳам ўз фаолиятини тўхтатганини эълон қилди, бироқ бошқалардан фарқли ўлароқ, компания RAV4 ва Camry ишлаб чиқариш учун бутловчи қисмларни етказиб беришда муаммоларга дуч келди. Таъминот занжирлари тикланиши билан транспорт воситаларини етказиб бериш қайта тикланади.
Аввалроқ Apple Россияда маҳсулот сотишни тўхтатгани хабар қилинганди. Шунингдек, Jaguar ва Land Rover Россияга автомобиль етказиб беришни тўхтатгани ҳақида хабар берилди.
