Миллиардер Роман Абрамовичнинг ўғли Аркадий Абрамовичга тегишли Zoltav Resources нефть ва газ компанияси ўн йиллик савдодан сўнг Лондон фонд биржасини тарк этади. Бу ҳақда Forbes хабар берди.

Қайд этилишича, компания муҳим хорижий инвесторларни жалб қила олмаган. Савдога киришни сақлаб қолиш харажатлари фойдадан юқори бўлган.

Маълумот ўрнида, Zoltav Resources компанияси Россияда нефть ва газни қидириш ва қазиб олиш билан шуғулланади. Компания Саратов вилоятида нефть ва газ ишлаб чиқаради, шунингдек, Ханти-Мансийск автоном округида фойдали қазилмаларни қидириш ва қазиб олиш учун лицензияга эга.

Хабарга кўра, 2011 йилда Zoltav Resources хорижий капитални жалб қилиш учун Лондон фонд биржасида муқобил инвестиция бозорига кирган. Бироқ, ушбу давр ичида Лондон бозоридаги инвесторларнинг кичик нефть ва газ компанияларига муносабати ёмонлашган. Бу айниқса, Россияга қаратилган компанияларга қаттиқ таъсир қилган. Шу сабабли Zoltav Resources инвестиция жалб қила олмаган.

Аввалроқ Роман Абрамович Россиядаги энг қиммат шахсий самолётни сотиб олгани хабар қилинганди.