Миллиардерлар нима ўқийди? Билл Гейтсдан 5 та китоб тавсия
Тадбиркор қайси китоблардан илҳом олгани маълум бўлди.
Microsoft асосчиси Билл Гейтс китобларни севиши билан ҳам таниқлидир. Миллиардернинг сўзларига кўра, у ҳафтада бир китоб ўқишга ҳаракат қилади. Тадбиркор ўқиган энг яхши китобларини Гейтс эслатмаларида (Gates Notes) мунтазам равишда баҳам кўради.
Сатья Наделла, «Саҳифани янгиланг. Microsoft трансформацияси ва келажак технологиялари ҳақида биринчи шахсдан»
Китоб муаллифи Сатья Наделла келиб чиқиши ҳиндистонлик бўлган инженердир. У 1967 йилда Ҳайдарободда туғилган, 2014 йилдан бери эса Microsoft компаниясининг бош директори (CEO) ҳисобланади.
Китоб ўқувчини уч босқичли йўл билан манзилга олиб боради: Ҳиндистондан Қўшма Штатларга, Америкадаги янги уйдан Силикон водийсигача, кейин эса Microsoft’га. Бу — Microsoft компаниясининг амалдаги бош директори Сатья Наделланинг босиб ўтган йўли.
Сатья Наделла ишида у ўз ҳаётини ўзгартиришга эмас, балки компанияни ўзгартиришга кўпроқ эътибор қаратган. Муаллиф китобда рақобат, трансмиллий компанияларнинг кучайиши ҳамда технология ва сунъий интеллект этикаси ҳақида сўзлаб берган. Гейтс Наделланинг китобига сўнгги фикрни ёзиб берган ва уни «келажак учун қўлланма» деб атаган.
Абҳижит Банержи ва Эстер Дюфло, «Қийин вақтлар учун яхши иқтисод»
Китоб ҳаммуаллифи Абҳижит Банержи келиб чиқиши ҳиндистонлик бўлган иқтисодчидир. У 1961 йилда Мумбайда туғилган ва 2019 йилда Нобель мукофотига сазовор бўлган.
Китобда иқтисодиёт қандай қилиб инсониятнинг долзарб муаммолари — тенгсизлик, эркин савдо йўлидаги тўсиқлар, сиёсий бўлиниш ва қашшоқликни камайтиришда ёрдам бераётгани ҳақида сўз боради.
Роберт Айгер, «Умрга тенг саёҳат: Walt Disney бош директори сифатида 15 йил давомида олган сабоқларим»
The Walt Disney Company директорлар кенгаши раиси Роберт Айгернинг китоби улкан компанияни 15 йил давомида бошқариш қандай экани ҳақида ҳикоя қилади.
Айгер компания учун қийин пайтларда Disney’ни бошқарган: ўтмишдаги муваффақиятлар энди даромад олиб келмаётган ва замонавий фойдали лойиҳалар деярли йўқ бўлган вақтлар эди. Айнан Айгер туфайли компания ўн йил давомида ўйин-кулги бозоридаги аутсайдердан кучли иштирокчига айланди.
Пол Коллиер, «Капитализмнинг келажаги»
Ушбу китобда Оксфорд университетининг иқтисодиёт профессори ва Халқаро ўсиш маркази директори Пол Коллиер нима учун капитализмни ўзидан қутқариш кераклиги ҳақида фикр юритган.
Жо Стадвелл, «Осиё бошқарув модели: дунёдаги энг динамик минтақанинг зафар ва муваффақиятсизликлари»
Гейтс «Осиё бошқарув модели»ни ўқишни бошлашига китоб иқтисодий ривожланишнинг иккита асосий саволига жавоб берганлиги сабаб бўлган:
- «Япония, Жанубий Корея ва Хитойнинг иқтисодий мўъжизаси ортида нима турибди?»
- «Нима учун кам сонли давлатлар бу муваффақиятга эриша олди?»
Аввалроқ Илон Маск қандай китоблар ўқиши ҳақида батафсил маълумот берилганди.
