Дунёнинг энг бой криптомиллиардерлар ўнталиги ноябрь ойидан бери қарийб 30 миллиард доллар йўқотди. Бу ҳақда Forbes хабар берди.

Маълумотларга кўра, дунёдаги энг бой ўнта криптомиллиардер биткоин ва бутун крипто бозори ўзининг энг юқори қийматига етган 10 ноябрдан бери жами 26,9 миллиард доллар йўқотган. Ўнта энг бой криптомиллиардердан учтаси бу даврда бойликларининг ярмидан айрилган.

Йўқотишлар бўйича етакчи MicroStrategy молия директори Майкл Сейлор бўлди, унинг бойлиги 55 фоизга — 3,1 миллиард доллардан 1,4 миллиард долларгача қисқарган. Иккинчи ўринда — Bloq блокчейн стартапи ҳаммуассиси Метью Росзак, бойлиги 52 фоизга қисқариб, 1,4 миллиард долларгача камайган. Сармоядор Тим Дрейпер кучли учликни ёпган — унинг криптоактивлари ҳозирда 1 миллиард долларга баҳоланмоқда. Дрейпернинг бойлиги ноябрь ойидагининг тенг ярмига камайган.

• энг йирик крипто-биржаси Coinbase’нинг ҳаммуассиси Фред Эрсамнинг бойлиги 4 миллиард доллардан 2,3 миллиард долларга (-43 фоиз), компания асосчиси Брайан Армстронгнинг бойлиги 13,5 миллиард доллардан 7,9 миллиард долларга (-41 фоиз) камайган;
• Ripple асосчиларидан бири Крис Ларсеннинг бойлиги 6,1 миллиард доллардан 3,8 миллиард долларга (-38 фоиз) камайган;
• FTX криптобиржаси асосчиси Сем Банкмен-Фриднинг капитали 26,9 миллиард доллардан 17 миллиард долларгача (-37 фоиз) камайган.

Шунингдек, эгизаклар Кемерон ва Тайлер Уинклвоссларнинг бойлиги 5 миллиард доллардан 3,8 миллиард долларгача (-24 фоиз) камайган ҳамда Ripple ҳаммуассиси Жед МакКалеб крипто активларининг қиймати 3,1 миллиард доллардан 2,3 миллиард долларгача (-26 фоиз) камайган.

Қайд этилишича, рўйхатни тузишда 10 ноябрдан 24 январгача капиталлар ўзгаришлари ҳисоблаб чиқилган, бу даврда барча криптовалюталарнинг бозор капиталлашуви деярли 3 триллион доллардан 1,7 триллион долларгача (-43 фоиз) камайган. Шунингдек, озорнинг пасайиши давом этиши мумкинлиги таъкидланмоқда.

Бундан ташқари, 24 январь куни биткоиннинг савдо пайтидаги нархи 33 минг 46 долларга етган, бу июль ойининг охиридан бери энг паст кўрсаткичдир. Ethereum нархи ҳам 10 фоиздан кўпроққа тушган. Мутахассислар криптовалюталарнинг пасайишини Россия ва Украина ўртасидаги ҳарбий можародан хавотирланиш билан изоҳлаган.

Шунингдек, бозорларда биткоин қимматли қоғозлар билан «тандемда» ҳаракат қиладиган камдан-кам ҳолатлар мавжуд. Таҳлилчилар қимматли қоғозлар бозоридаги ўзгаришларни истисно қилмаган, бу ҳам криптовалюталарга ўз таъсирини ўтказиши мумкин.

Аввалроқ Марк Цукерберг ўзининг криптовалюта лойиҳасини тўхтатиши хабар қилинганди. Шунингдек, Жаҳон криптовалюта бозори бир суткада 130 млрд доллар йўқотгани ҳақида хабар берилди.