Ўртача иш ҳақи бўйича статистика эълон қилинди: таълим ва соғлиқни сақлаш энг кам маошли соҳалигича қолмоқда
Статистика қўмитаси ўртача ойлик номинал ҳисобланган иш ҳақи бўйича маълумот берди.
Давлат статистика қўмитаси 2022 йилнинг биринчи ярим йиллиги бўйича ўртача ойлик маош статистикасини эълон қилди.
Маълум бўлишича, 2022 йил январь-июнь ойларида Республикадаги ўртача ойлик номинал ҳисобланган иш ҳақи 3 миллион 540 минг 500 сўмни ташкил этган. Кўрсаткич 2021 йил январь-июнь ойларида 2 968 минг 500 сўмни ташкил этган бўлиб, 2021 йилнинг мос даврига нисбатан ўсиш суръати 119,3 фоизни ташкил қилган.
Ҳудудлар кесимида энг катта кўрсаткич Тошкентда — 5 миллион 486 минг 200 сўм, энг кичик кўрсаткич эса Самарқандда — 2 миллион 663 минг 200 сўм бўлиб турибди.
Юқоридаги кўрсаткичларда қишлоқ хўжалиги корхоналари ва кичик тадбиркорлик ҳисобга олинмаган бўлиб, қўмита буни қуйидагича изоҳлаган:
«2022 йил январь-июнь ойлари учун ўртача ойлик иш ҳақи кўрсаткичини шакллантиришда қишлоқ хўжалиги ва кичик тадбиркорлик субъектлари ҳисобга олинмаган, чунки фермер хўжаликлари ҳамда кичик тадбиркорлик субъектлари йилда бир марта ҳисобот тақдим этиши белгиланган».
Соҳалар кесимида эса ўртача ойлик иш ҳақининг энг баланд кўрсаткичи — банк, суғурта, лизинг, кредит ва воситачилик фаолияти соҳасига тўғри келиб (9 миллион 149 минг 600 сўм), ўтган йилнинг мос даврига нисбатан ўсиш даражаси 124,8 фоизни ташкил этган.
Соғлиқни сақлаш ва ижтимоий хизматлар кўрсатиш ҳамда таълим соҳаси эса ўртача ойлик энг кам соҳалигича қолган. Бу соҳалардаги ўртача ойлик қуйидагича: соғлиқни сақлаш ва ижтимоий хизматлар кўрсатишда 2 миллион 377 минг 200 сўм, таълимда 2 миллион 583 минг 800 сўм.
Эслатиб ўтамиз, 2021 йил якуни бўйича ҳам таълим (2 миллион 313 минг 100 сўм) ҳамда соғлиқни сақлаш ва ижтимоий хизматлар кўрсатиш (2 миллион 157 минг 800 сўм) соҳаларида ойлик иш ҳақининг энг паст кўрсаткичи қайд этилган.
Эътиборга молик жиҳати соғлиқни сақлаш соҳаси 2016, 2017 ва 2018 йилларда энг кам иш ҳақи тўланадиган 3 та соҳанинг бири бўлган. Ҳолат 2019–2020 йилларга қелиб бироз яхшиланган бўлса, 2021 йилда бу соҳа яна республикада энг кам ўртача иш ҳақи тўланадиган соҳага айланган. 2022 йилнинг биринчи ярмида ҳам вазият ўзгармади. Бундан ташқари, мазкур соҳадаги ўртача маошлар 6 йил давомида доим мамлакатдаги ўртача маошдан паст бўлган.
Таълим соҳасида аҳвол шунга ўхшаш: 2016 йилдан бери бу соҳадаги ўртача иш ҳақи ҳам доимий равишда мамлакатдаги ўртача иш ҳақидан паст бўлиб келган. Лекин таълим 2021 йилгача энг кам маош тўланадиган соҳалардан бири бўлмаган. Қайд этиш лозимки, фақатгина шу йилга келиб таълим республикадаги энг кам ўртача маош тўланаётган соҳалардан бирига айланган.