ОТБ Ўзбекистонда салкам 3 млрд долларлик лойиҳаларни амалга оширади
Банк раҳбарияти Тошкент халқаро инвестиция форуми ва у доирасидаги тадбирларда иштирок этишга таклиф қилинди.
Осиё тараққиёт банки Ўзбекистонда 2022-2024 йиллар умумий қиймати 2,8 миллиард долларга тенг бўлган 27 лойиҳа амалга оширишни режалаштирган. Бу ҳақда бош вазир ўринбосари Сардор Умурзоқов ва Осиё тараққиёт банки президенти Масацугу Асакаванинг музокараларида маълум қилинди.
Қайд этилишича, ОТБнинг 2022-2024 йилларга мўлжалланган мамлакатлар билан операцияларнинг бизнес-режаси доирасида Ўзбекистонда умумий қиймати 2,8 миллиард долларга тенг бўлган 27 лойиҳа амалга оширилиши режалаштирилган. Шундан 524 миллион долларлик 3 лойиҳа 2022 йилда ҳаётга жорий этилади.
Томонлар маъқулланган ташаббусларни амалга оширишни жадаллаштириш ва кўриб чиқилаётган лойиҳаларни келишиш бўйича яқиндан ҳамкорлик қилиш тўғрисида келишиб олгани маълум қилинди.
Шунингдек, мулоқот чоғида банк раҳбарияти Тошкент халқаро инвестиция форуми ва у доирасидаги тадбирларда иштирок этишга таклиф қилинган.
Музокаралар якунида икки томон учун устувор бўлган қатор йўналишларда ҳамкорликни фаоллаштириш бўйича келишувларга эришилгани қайд этилди.
