Иқтисодий тараққиёт вазирлиги томонидан 1–30 ноябрь кунлари Қўйлиқ ва Чорсу деҳқон бозорларида асосий истеъмол товарларининг улгуржи нархлари бўйича кузатув натижалари эълон қилиниб борилди. Вазирлик асосий турдаги қишлоқ хўжалиги ва гўшт маҳсулотларининг улгуржи нархлари ўзгариши юзасидан таҳлилий маълумот берди.

Арзонлашган маҳсулотлар

Ушбу давр мобайнида бозорда сариқ сабзи 1500 сўмга, қизил сабзи 1000 сўмга, импорт ва маҳаллий олма 1000 сўмга, лавлаги 1000 сўмга, бодринг 500 сўмга, нок 2500 сўмга, киви 20 минг сўмга, гуруч 1000 сўмга ва лимон 2500 сўмга арзонлаган.

Қимматлаган маҳсулотлар

Бозорларда картошка 575 сўмга, пиёз 150 сўмга, карам 350 сўмга, саримсоқ пиёз 5500 сўмга, помидор 2250 сўмга, бақлажон 250 сўмга ва қовун 3500 сўмга ошган.

Бозорларга энг кўп келтирилган маҳсулотлар

Тезкор маълумотларга асосан, Қўйлиқ бозорига 1–30 ноябрь кунлари ҳудудлардан жами 20,8 минг тонна маҳсулот, хусусан, 12,5 минг тонна картошка, 6,0 минг тонна пиёз, 777 тонна карам ва 1,6 минг тонна сабзи келтирилган.

Шундан, Тошкент вилоятидан 1938 тонна картошка, 1410 тонна пиёз, 777 тонна карам, 613 тонна сабзи, Самарқанд вилоятидан 918 тонна картошка, 720 тонна сабзи, Жиззах вилоятидан 3,8 минг тонна пиёз ва 22 тонна сабзи, Қашқадарё вилоятидан 384 тонна, Фарғона вилоятидан 74 тонна, Андижон вилоятидан 27 тонна, Бухоро вилоятидан 6 тонна, Сурхондарё вилоятидан 191 тонна ва Сирдарё вилоятидан 283 тонна сабзи маҳсулотлари етказиб берилган.

Шунингдек, Қўйлиқ бозорига Қозоғистондан 3855 тонна, Қирғизистондан 605 тонна, Афғонистондан 2145 тонна ва Эрондан 2991 тонна картошка келтирилган.

Шу билан бирга, ҳудудлардан Чорсу деҳқон бозорига 1–30 ноябрь кунлари жами 220,0 тонна гўшт маҳсулотлари, шу жумладан 191,1 тонна мол гўшти ва 28,9 тонна қўй гўшти келтириб сотилган.

Аввалроқ Ўзбекистонда 2021 йил кластерлар томонидан қанча қишлоқ хўжалиги маҳсулотлари етиштирилгани хабар қилинганди. Шунингдек, Шавкат Мирзиёев мева-сабзавот экспорти 5 миллиард долларга етказилишини айтгани ҳақида хабар берилди.