«Ўзбекистон республика товар-хом ашё биржаси»нинг барча савдо платформаларида 20–26 декабрь кунлари 2 триллион 302,9 миллиард сўмлик товарлар сотилди. Бу ҳақда биржа матбуот хизмати хабар берди.

Маълум қилинишича, сотилган товарлар ҳажми аввалги ҳафтага нисбатан 5,6 фоизга кўпдир. Бунда сотувларнинг 79,9 фоизи — биржа савдолари; 0,1 фоизи — кўргазма-ярмарка савдолари; 19,8 — электрон давлат харидлари ва 0,2 — авторақамларнинг онлайн-аукционига тўғри келган.

Шунингдек, кичик бизнес ва хусусий тадбиркорлик субъектлари иштирокида тузилган битимларнинг умумий ҳажми 1 триллион 21,6 миллиард сўмни ташкил қилган. Давлат харидлари тизимларида ўтказилган электрон савдолар натижасида бюджет ва корпоратив буюртмачиларининг қарийб 53,8 миллиард сўмлик маблағлари тежалган.

Таъкидланишича, кўриб чиқилаётган даврда очиқ биржа савдолари орқали жами 1 триллион 840,0 миллиард сўмлик товар ресурслари сотилган. Сотувчи корхоналар маҳсулотларни тасдиқланган жадвалларга риоя қилган ҳолда биржа савдоларига қўйган. Шу жумладан биржада АИ-80 русумли автомобиль бензинининг нархи сезиларли пасайган. Ўртача кунлик сотув ҳажмлари 4,4 минг тоннани ташкил қилган.

Кўриб чиқилаётган даврда АИ-80 русумли автомобиль бензинининг кунлик ўртача нархлари маҳсулотнинг бир тоннаси учун 8 миллион 151,3 минг сўмдан 7 миллион 762,3 минг сўмгача, яъни 4,8 фоизга пасайган. Ўтказилган биржа савдолари натижасида АИ-80 русумли автомобиль бензини бўйича шаклланган ўртача ҳафталик нарх маҳсулотнинг бир тоннаси учун 7 миллион 914,2 минг сўмни ташкил этган.

Шунингдек, биржа савдоларида 2601,0 тонна пахта ёғи сотилган. Ўтказилган савдоларда ҳар куни ўртача 61 харидор иштирок этган. Кўриб чиқилаётган даврда барча навли пахта ёғининг кунлик ўртача нархлари маҳсулотнинг бир тоннаси учун 15 миллион 745,9 минг сўмдан 15 миллион 616,9 минг сўмгача, яъни 0,8 фоизга пасайган.

Бундан ташқари, биржанинг шакар бозорида нархлар пасайиши қайд этилган. Ҳафта давомида биржа савдоларига 11 минг 982,0 тонна шакар қўйилган ва улардан 9635,0 тоннаси, яъни 80,4 фоиз қисми сотилган. Шакарнинг барча категорияси бўйича шаклланган кунлик ўртача нархлар маҳсулотнинг бир тоннаси учун 7 миллион 864,9 минг сўмдан 7 миллион 759,9 минг сўмгача, яъни 1,3 фоизга пасайган.

Шунингдек, ўтказилган биржа савдолари натижасида маҳаллий шакарнинг ТС-2 категорияси бўйича шаклланган ўртача ҳафталик нархи маҳсулотнинг бир тоннаси учун 7 миллион 789,0 минг сўмни ташкил этган.

Аввалроқ Ўзбекистонда уй-жой нархи 2020 йилга нисбатан қимматлагани хабар қилинганди. Шунингдек, биржа фондларига маблағлар оқими биринчи марта 1 триллион доллардан ошгани ҳақида хабар берилди.