«Ўзбекистон республика товар-хом ашё биржаси»нинг барча савдо платформаларида 15–21 ноябрь кунлари 2 триллион 135,4 миллиард сўмлик товарлар сотилди. Бу ҳақда биржа матбуот хизмати хабар берди.

Маълум қилинишича, сотилган товарлар ҳажми аввалги ҳафтага нисбатан 26,3 фоизга кўпдир. Бунда сотувларнинг 85,1 фоизи — биржа савдолари; 0,1 фоизи — кўргазма-ярмарка савдолари; 14,5 фоизи — электрон давлат харидлари ва 0,3 фоизи — авторақамларнинг онлайн-аукционига тўғри келган.

Шунингдек, кичик бизнес ва хусусий тадбиркорлик субъектлари иштирокида тузилган битимларнинг умумий ҳажми 829,2 миллиард сўмни ташкил қилган. Давлат харидлари тизимларида ўтказилган электрон савдолар натижасида бюджет ва корпоратив буюртмачиларининг қарийб 39,4 миллиард сўмлик маблағлари тежалган.

Таъкидланишича, кўриб чиқилаётган даврда очиқ биржа савдолари орқали жами 1 818,0 миллиард сўмлик товар ресурслари сотилган. Сотувчи корхоналар маҳсулотларни тасдиқланган жадвалларга риоя қилган ҳолда биржа савдоларига қўйган. Шу жумладан биржада АИ-80 русумли автомобиль бензинининг нархи сезиларли пасайган. Ўртача кунлик сотув ҳажмлари 3,3 минг тоннани ташкил қилган.

Кўриб чиқилаётган даврда АИ-80 русумли автомобиль бензинининг кунлик ўртача нархлари маҳсулотнинг бир тоннаси учун 10 миллион 129,4 минг сўмдан 9 миллион 168,4 минг сўмгача, яъни 9,5 фоизга пасайган. Ҳафта якунига кўра биржа бозорининг мазкур сегментида таклиф даражаси 3,1 фоизгача ўсган. Биржа савдолари орқали бензинни сотиб олган харидорларнинг сони 32 тадан 143 тагача, яъни 4,5 бараварга ўсган.

Шунингдек, биржа савдоларига 4666,0 тонна суюлтирилган газ қўйилган ва ундан 4344,0 тоннаси, яъни 93,1 фоиз ҳажми сотилган. Ўтказилган савдоларда ҳар куни ўртача 110 харидор иштирок этган.

Кўриб чиқилаётган даврда суюлтирилган газнинг ўртача кунлик нархи маҳсулотнинг бир тоннаси учун 3 миллион 874,1 минг сўмдан 3 миллион 836,9 минг сўмга, яъни 1,0 фоизга пасайган. Шунингдек, суюлтирилган газнинг ўртача ҳафталик котировкаси 3 миллион 855,8 минг сўмни ташкил этган.

Бундан ташқари, биржа савдоларига 301 857,0 тонна цемент қўйилган ва улардан 120 957,0 тоннаси, яъни 40,1 фоизи сотилган. Ўртача кунлик сотув ҳажмлари 24,2 минг тоннани ташкил қилган.

Шунингдек, кўриб чиқилаётган даврда цементнинг барча маркалари бўйича шаклланган кунлик ўртача нархлар маҳсулотнинг бир тоннаси учун 504,7 минг сўмдан 501,4 минг сўмгача, яъни 0,6 фоизга пасайган. Ўтказилган савдоларда ҳар куни ўртача 216 харидор иштирок этган. Кўриб чиқилаётган даврда цементнинг ўртача ҳафталик котировкаси 499,3 минг сўмни ташкил этган.

Аввалроқ Ўзбекистонда 9 ойда қанча бензин ишлаб чиқарилгани хабар қилинганди. Шунингдек, Ўзбекистонда газ захирасининг куз-қиш мавсумига етиш-етмаслиги бўйича маълумот берилди.