Ўзбекистон ва Франция коррупцияга қарши курашиш бўйича ҳамкорлик қилади
Ўзбекистон томонига NCPA халқаро тармоғига қўшилиш шартлари бўйича маълумот берилди
Ўзбекистон ва Франция Коррупцияга қарши курашиш агентликлари биргаликда ҳамкорлик истиқболларини муҳокама қилди. Бу ҳақда агентлик матбуот хизмати хабар берди.
Маълум қилинишича, 19 ноябрь куни Ўзбекистон ва Франция Коррупцияга қарши курашиш агентликлари вакиллари ўртасида учрашув бўлиб ўтган. Унда Франция агентлигининг директори Шарль Дюшен иштирок этган.
Мулоқот давомида Ўзбекистон вакиллари давлат органлари ва хусусий секторда коррупцияга қарши кураш бўйича кўрилаётган чора-тадбирлар, бу борада мониторинг қилиш самарадорлигини баҳолаш механизмлари ва тамойиллари каби бир қатор йўналишларда Франция агентлиги тажрибаси билан яқиндан танишган. Шунингдек, Network of Corruption Prevention Authorities (NCPA) Коррупциянинг олдини олиш органлари халқаро тармоғига қўшилиш шартлари хусусида атрофлича маълумот берилган.
Маълумот ўрнида, NCPA (Network of Corruption Prevention Authorities —Коррупциянинг олдини олиш органлари халқаро тармоғи) бутун дунё бўйлаб коррупцияга қарши курашиш органлари ўртасида бошқарув ва ахборот тизимини жорий этиш, ўзаро тажриба алмашишни осонлаштириш мақсадида 2018 йил октябрь ойида ташкил этилган. 2019 йилда Франция Коррупцияга қарши курашиш агентлиги мазкур халқаро тармоқнинг президенти этиб сайланган.
Қайд этилишича, учрашувда икки томонлама ҳамкорлик алоқаларини янада кенгайтириш, ўзаро тажриба алмашиш ва қўшма лойиҳаларни амалга ошириш масалалари муҳокама қилинган.
Аввалроқ Бизнес-омбудсман БМТ ва ЕТТБ билан коррупцияга қарши ҳамкорлик қилиши ҳақида хабар берилганди. Шунингдек, Коррупцияга қарши курашиш агентлиги АҚШ идоралари билан ҳамкорлик ўрнатиши мумкинлиги хабар қилинди.