Ўзбекистонда 11 ойда 9 миллиард 229 миллион доллар миқдорида хорижий инвестиция ўзлаштирилган. Бу ҳақда АОКАда бўлиб ўтган брифингда Инвестициялар ва ташқи савдо вазирлиги Бош бошқармаси бошлиғи Иномжон Абдураҳмонов хабар берди.

Тезкор маълумотларга кўра, 2021 йилнинг январь-ноябрь ойларида 9 миллиард 229 миллион доллар хорижий инвестициялар ўзлаштирилган. Инвестиция ўзлаштирилиши прогнозга нисбатан 111 фоизга бажарилган.

Хусусан, тўғридан-тўғри хорижий инвестиция ва кредитлар миқдори 7 миллиард 318 миллион доллар (прогнозга нисбатан 115 фоиз)ни ташкил этган. Шунингдек, халқаро молия институтлари ва хорижий ҳукумат молия ташкилотлари маблағлари 1 миллиард 910 миллион долларни (прогнозга нисбатан 101 фоиз)га етган.

Шу билан бирга, тўғридан-тўғри хорижий инвестициялар бўйича тармоқ корхоналари томонидан 3 миллиард 37 миллион доллар (прогнозга нисбатан 106 фоиз) ўзлаштирилган. Шунингдек, ҳудудий лойиҳалар доирасида ўзлаштирилган маблағлар миқдори 4 миллиард 281 миллион доллар (121 фоиз)ни ташкил қилган.

Бундан ташқари, тармоқлар бўйича энергетика соҳасида 946 миллион (1,6 баравар), нефть ва газ соҳасида 658 миллион (3,2 баравар), тоғ-кон металлургия соҳасида 628 миллион (1,2 баравар), қурилиш материалларни ишлаб чиқиш саноатида 162 миллион (1,1 баравар), тўқимачилик соҳасида 128,7 миллион , кимё саноатида 97 миллион (2,8 баравар) доллар ўзлаштирилган. Ҳудудлар бўйича асосий ўсиш Хоразм (1,6 баравар), Сирдарё (110 фоиз) ва Бухоро (109 фоиз) вилоятлари ҳиссасига тўғри келмоқда.

Қайд этилишича, халқаро молия институтлари ва хорижий ҳукумат молия ташкилотлари маблағларининг асосий қисми Осиё тараққиёт банки (жами ҳажмга нисбатан 25 фоиз ёки 471 миллион доллар), Жаҳон банки (20 фоиз ёки 382 миллион доллар), Хитой (16 фоиз ёки 300 миллион доллар), Ислом тараққиёт банки (5,2 фоиз ёки 99 миллион доллар) ва Япония (3,9 фоиз ёки 75 миллион доллар) давлатларининг молия институтлари ҳиссасига тўғри келган.

Ушбу маблағлар асосан транспорт (24 фоиз ёки 466 миллион доллар), энергетика (21 фоиз ёки 404 миллион доллар), қишлоқ ва сув хўжалиги (17 фоиз ёки 328 миллион доллар), соғлиқни сақлаш (7,5 фоиз ёки 143 миллион доллар), коммунал хўжалиги (7,2 фоиз ёки 138 миллион доллар) ва қишлоқ жойларида уй-жой қурилиши (6,3 фоиз ёки 121 миллион доллар) соҳаларига йўналтирилган.

Аввалроқ Ўзбекистонда инвестиция дастурлари доирасида 18,5 триллион сўмлик лойиҳалар амалга оширилиши хабар қилинганди. Шунингдек, Жаҳон банки Ўзбекистонга 400 миллион доллар кредит ажратиши ҳақида хабар берилди.