Ўзбекистонда 2022 йил балиқчилик лойиҳаларига 20 млн евро йўналтирилади
Президент 21 минг гектар сунъий ҳавзаларда ҳосилдорликни 3 бараварга ошириш кераклигини таъкидлади.
Ўзбекистонда 2022 йил балиқчилик лойиҳаларига 20 миллион евро йўналтирилиши белгиланмоқда. Бу ҳақда Президент матбуот хизмати хабар берди.
Маълум қилинишича, Президент Шавкат Мирзиёев ҳузурида балиқчилик соҳасини ривожлантириш истиқболлари ва кооперация асосида балиқ етиштириш самарадорлигини ошириш чора-тадбирлари юзасидан кенгайтирилган йиғилиш ўтказилган.
Йиғилишда 2022 йилда йирик балиқчилик лойиҳаларига 20 миллион евро йўналтирилиши маълум қилинган. Шунингдек, 2022 йилда балиқчилик хўжаликларига 530 миллиард сўм, шундан айланма маблағлар учун 200 миллиард сўм кредит ресурслари ажратилиши айтилган.
Қайд этилишича, ҳосилдорлиги паст бўлган 21 минг гектар сунъий ҳавзаларда ҳосилдорликни 3 бараварга ошириб, қўшимча 190 минг тонна балиқ етиштириш зарурлиги айтилган. 2,2 мингта хўжаликда 50 мингта аератор (кислород билан бойитиш ускунаси) ўрнатиш вазифаси қўйилган.
Аввалроқ Президент балиқчилик учун бериладиган имтиёзларни санагани хабар қилинганди.
