Ўзбекистонда автомобиль экспорти камайди, импорт ва ишлаб чиқариш кескин ошди — Статқўм
Енгил автомобиллар импорти 2021 йилнинг мос даври билан солиштирилганда 5361 тага ёки 2,7 баробарга ошган.
Ўзбекистонда 2022 йилнинг январь-март ойларида 68 905 дона енгил автомобиль ишлаб чиқарилган. Бу ҳақда Давлат статистика қўмитаси маълумот берди.
Қайд этилишича, енгил автомобиллар ишлаб чиқариш ҳажми 2021 йилнинг мос даври билан солиштирилганда 24451 тага ошган. 2022 йилнинг январь-март ойларида Ўзбекистон Озарбайжон, Тожикистон, Корея ва Ливанга 58 дона енгил автомобиль экспорт қилган. Бу кўрсаткич 2021 йилнинг мос даври билан солиштирилганда 8763 тага камайган.
Таъкидланишича, 2022 йилнинг январь-март ойларида Ўзбекистон 21 та хорижий давлатлардан қиймати 189,3 миллион долларга тенг бўлган 8 508 та енгил автомобиль импорт қилган. Енгил автомобиллар импорти 2021 йилнинг мос даври билан солиштирилганда 5361 тага ёки 2,7 бараварга ошган.
Шунингдек, Ўзбекистонга 3 ойда 455 та электромобиль импорт қилинган. Электромобиль импорти 2021 йилнинг мос даврига нисбатан 370 тага ёки 5,4 баробарга ошган.
Маълумот учун, Ўзбекистонда март ойида Cobalt автомобили энг кўп ишлаб чиқарилди.
Аввалроқ Ўзбекистон асосан қайси давлатлардан енгил автомобиль импорт қилаётгани маълум бўлганди.