Ўзбекистоннинг Фарғона, Самарқанд, Тошкент, Андижон, Қашқадарё вилоятлари ва Тўшкент шаҳарлари экспортида кескин ўсиш кузатилди. Бу ҳақда АОКАда бўлиб ўтган брифингда Инвестициялар ва ташқи савдо вазирлиги Бош бошқармаси бошлиғи Иномжон Абдураҳмонов хабар берди.

Маълум қилинишича, 2021 йилнинг январь-ноябрь ойларида Ўзбекистоннинг барча ҳудудлари томонидан экспорт кўрсаткичлари тўлиқ таъминланган. Шунингдек, 2020 йилнинг мос даврига нисбатан 144 фоизга ёки 1 миллиард 652 миллион доллар ўсишга эришилган.

Жумладан, Фарғона (1,5 баравар, +220 миллион доллар), Самарқанд (1,6 баравар, +156 миллион доллар), Тошкент (1,3 баравар, +150 миллион доллар), Андижон (1,3 баравар, +133 миллион доллар), Қашқадарё (1,7 баравар, +81,6 миллион доллар) вилоятлари ва Тошкент (1,6 баравар, +443 миллион доллар) шаҳрида кескин ўсиш суръатлари кузатилган.

Қайд этилишича, ҳисобот даврида 870 миллион долларлик 1,4 миллион тонна 65 турдаги мева-сабзавот маҳсулотлари экспорти амалга оширилиб, 2020 йилнинг мос даврига нисбатан қиймат жиҳатдан 93 фоизга, миқдор жиҳатдан 100 фоизга бажарилган.

Аввалроқ Ўзбекистонда энг кўп мева-сабзавот экспорт қилаётган ҳудудлар хабар қилинганди. Шунингдек, Ўзбекистондаги ҳудудлар инвестицион муҳитининг Миллий рейтинги ишлаб чиқилиши ҳақида хабар берилди.