Ўзбекистонга сўнгги 3 ойда 455 та электромобиль импорт қилинди. Бу ҳақда Давлат статистика қўмитаси маълумот берди.

Унга кўра, 2022 йилнинг январь-март ойларида Ўзбекистон 9 та хорижий давлатдан қиймати 13,5 миллион долларга тенг бўлган 455 та электромобиль импорт қилган. Электромобиль импорти 2021 йилнинг мос даврига нисбатан 370 тага ёки 5,4 бараварга ошган.

Қайд этилишича, 2022 йилнинг дастлабки 3 ойида Ўзбекистон асосан қуйидаги давлатлардан электромобилларни импорт қилган:

1. Хитой — 426 та;
2. Германия — 13 та;
3. Гонконг — 7 та;
4. БАА — 3 та;
5. Эстония — 2 та;
6. АҚШ — 1 та;
7. Канада — 1 та.

Аввалроқ Шавкат Мирзиёев электромобиль ишлаб чиқариш бўйича амалий ишларни ҳозирдан бошлаш кераклигини таъкидлаганди.

«Яна бир масала — жаҳонда электромобиллар ишлаб чиқариш жадал ривожланиб, автомобиль бозорида салмоқли ўрин эгалламоқда. Биз ҳам бу соҳада ортда қолмаслигимиз учун амалий ишларни ҳозирдан бошлашимиз керак», — деганди Президент йиғилишда.

Шунингдек, Ўзбекистоннинг 2022–2026 йилларга мўлжалланган тараққиёт стратегиясида электромобиль ишлаб чиқариш ва улардан фойдаланиш рағбатлантирилиши маълум қилинганди.