Ўзбекистонда 2022 йил ҳар бир туман бюджетининг камида 5 фоизи аҳоли таклифларига ажратилади. Бу ҳақда Ўзбекистоннинг 2022–2026 йилларга мўлжалланган тараққиёт стратегияси лойиҳасида сўз боради.

Қайд этилишича, хар бир туман бюджетининг камида 5 фоизини «Фуқаролар бюджети» дастури доирасида аҳолининг таклифлари асосида энг долзарб муаммоларни ечишга сарфлашни ташкил қилиш режалаштирилган.

Туман ва шаҳарлар бюджетлари параметрларида ҳудудий ички йўлларни таъмирлаш учун ажратиладиган маблағларнинг камида 50 фоизи «Очиқ бюджет» ахборот портали орқали жамоатчилик фикри асосида аниқланган ички йўлларни таъмирлашга йўналтириш тартиби жорий этилади.

Шунингдек, ҳар йили ташаббусли бюджетлаштириш жараёнида фаол иштирок этган ҳамда ташаббус кўрсатган фуқароларни мукофотлаш мақсадида «Фаол ташаббускор» медали (давлат мукофоти) жорий этилади ҳамда 2022 йилдан бошлаб фуқаролар тақдирлаб борилади.

Аввалроқ Ўзбекистондаги 100 дан ортиқ туманнинг «Фуқаролар ташаббуси жамғармаси»га бюджетдан қўшимча маблағ ажратилиши ҳақида хабар берилганди.