Ўзбекистонда «Импорт қилинадиган товарларга нисбатан тариф квоталари қўллаш тартиби тўғрисида»ги низом тасдиқланди. Бу ҳақда Norma хабар берди.

Маълум бўлишича, Ўзбекистон Президентининг «Маҳаллий ишлаб чиқарувчиларни қўллаб-қувватлашга доир қўшимча чора-тадбирлар тўғрисида» 2020 йил 21 августдаги қарорига мувофиқ Вазирлар Маҳкамасининг 2 декабрдаги қарори билан «Импорт қилинадиган товарларга нисбатан тариф квоталари қўллаш тартиби тўғрисида»ги низом тасдиқланган.

Низомга кўра, тариф квотаси — муайян турдаги товарларни импорт қилишда кўп ҳолларда қўлланиладиган божхона тўлови ставкасига нисбатан маълум муддат давомида божхона тўловларининг пасайтирилган ставкаларини қўллашни назарда тутувчи тартибга солиш чораси.

Қайд этилишича, тариф квотаси ҳажми, амал қилиш муддати ва Ўзбекистон божхона ҳудудига бошқа давлатлардан олиб кириладиган товарларга нисбатан божхона божлари ставкалари Вазирлар Маҳкамаси томонидан белгиланади.

Тариф квоталари ҳажми, агар Ўзбекистон Республикасининг халқаро шартномаларида бошқача тартиб назарда тутилган бўлмаса, импорт қилувчилар ўртасида Инвестициялар ва ташқи савдо вазирлигининг қарорига мувофиқ тақсимланади.

Инвестициялар ва ташқи савдо вазирлиги Иқтисодий ривожланиш ва камбағалликни қисқартириш вазирлиги ҳамда Монополияга қарши қўмита билан биргаликда йилига камида бир марта истеъмол ҳажмидаги ўзгаришлар, ишлаб чиқариш қувватлари ва ички бозордаги нархларни ҳисобга олган ҳолда тариф квоталари жорий этиш тўғрисида Вазирлар Маҳкамасига таклифлар киритади.

Хабарга кўра, тариф квоталари қўллаш учун хўжалик юритувчи субъектлар Инвестициялар ва ташқи савдо вазирлигига ариза билан мурожаат қилиши керак. Аризани кўриб чиқиш учун ҳеч қандай тўлов олинмайди.

Тариф квоталари, муддатлари, божхона ставкаларини белгилаш/белгиламаслик тўғрисидаги якуний хулоса Вазирлар Маҳкамаси томонидан қабул қилинади.

Маълум қилинишича, оммавий ахборот воситаларида ва ўзининг расмий веб-сайтида тариф квотаси жорий этилганлиги тўғрисидаги эълонга мувофиқ, Инвестициялар ва ташқи савдо вазирлиги ўн иш куни ичида резидентлардан тариф квотаси ҳажмларини тақсимлаш учун аризаларни қабул қилади.

Ҳужжат Қонун ҳужжатлари маълумотлари миллий базасида давлат тилида эълон қилинган ва 03.03.2022 йилдан кучга киради.

Аввалроқ Ўзбекистонда товарларни божхона қийматини шартли белгилаш орқали чиқариб юбориш тартиби белгилангани хабар қилинганди.