2026 йилга қадар қайта тикланувчи энергия манбалари улушини 25 фоизга етказиш эвазига йилига қарийб 3 миллиард куб метр табиий газни тежаш ҳамда 8 миллион тонна ҳавога чиқариладиган зарарли газларнинг ҳажмини камайтириш режалаштирилди.

Янги Ўзбекистоннинг 2022–2026 йилларга мўлжалланган тараққиёт стратегияси тўғрисидаги Президент фармони лойиҳасига кўра, қайта тикланувчи энергия манбаларидан фойдаланишни кенгайтириш ва қўллаб-қувватлаш дастури ишлаб чиқилади. Бунда:

• камида 8 та шамол электр станцияларни (ШЭС) қуриш ҳисобига 4 гигаватт қўшимча қувватлар барпо этилади, жумладан:
• 2023 йилда Қорақалпоғистон Республикаси Беруний ва Қораузак туманлари ҳамда Бухоро вилояти Ғиждувон ва Пешку туманларида 3 та (1,1 гигаватт);
• 2024 йилда Бухоро вилояти Томди туманида 1 та (0,5 гигаватт);
• 2025-2026 йилларда Қорақалпоғистон Республикаси ва бошқа вилоятларда камида 4 та (2,4 гигаватт) ШЭС ишга туширилади.
• Ушбу лойиҳаларни амалга ошириш учун 4,7 миллиард долларлик тўғридан-тўғри хорижий инвестициялар жалб қилинади.

Энергетика вазирлиги, Инвестициялар ва ташқи савдо вазирлиги ҳамда Молия вазирлиги ушбу лойиҳаларга масъул бўлса, Бош вазир ўринбосари Жамшид Қўчқоров уларни назорат қилади.

Аввалроқ Ўзбекистонда 11 ойда қанча электр энергияси ишлаб чиқарилгани маълум бўлгани хабар қилинганди.