Ўзбекистонда рақамли экотизимга уланган тижорат платформалари учун фойда солиғи 50 фоизга қисқартирилади. Бу ҳақда Адлия вазирлигининг Huquqiy axborot канали хабар берди.

Маълум қилинишича, электрон тижорат маъмурчилигини такомиллаштириш ва уни янада ривожлантириш учун қулай шароитлар яратиш тўғрисида Президентнинг 17 ноябрдаги қарори  қабул қилинган. Қайд этилишича, 2022 йил 1 июлдан электрон тижоратнинг «Очиқ рақамли экотизими» тўлиқ ишга туширилади.

Таъкидланишича, электрон кооперация портали маркази Рақамли трансформация маркази этиб қайта ташкил этилади. Марказ рақамли экотизимни шакллантириши ва унинг оператори функцияларини бажариши белгиланган.

Шунингдек, рақамли экотизимга интеграциялашган электрон тижорат платформаларида товарлар ва хизматлар сотиш тўғрисидаги маълумотлар жойлаштирилади. 2024 йил 1 январгача рақамли экотизимга интеграциялашган электрон тижорат платформалари операторлари учун фойда солиғи ставкаси 50 фоизга камайтирилади.

Аввалроқ «Ўзбекнефтгаз» барча харидлар электрон шаклга ўтказилишини маълум қилгани ҳақида хабар берилганди. Шунингдек, Ўзбекистонда суғуртанинг барча турлари электрон амалга оширилиши хабар қилинди.