Ўзбекистонда талабалар билан тузилган кўчмас мулк ижара шартномаларини ҳам E-ijara интерактив хизматида ҳисобга қўйиш мумкин бўлди. Бу ҳақда Давлат солиқ қўмитаси матбуот хизмати хабар берди.

Қайд этилишича, ижара шартномасини ҳисобга қўйиш учун ижарага берувчи ijara.soliq.uz сайтига киради. У ердан «Ижарага олувчи тўғрисида маълумот» ойнасига ижарага олувчи талабанинг ЖШШИРни киритганда талабага оид маълумотлар (Ф.И.Ш, таълим олаётган ўқув юрти, факультети, таълим шакли ва босқичи, шунингдек доимий рўйхатга олинган манзили) автоматик шаклланади.

Шунингдек, «Телефон рақами» қаторига ижарага олувчи талабанинг телефон рақами киритилиб, «Тасдиқлаш кодини юбориш» тугмаси босилади. Талабанинг телефонига SMS орқали келган 5 хонали рақам «Тасдиқлаш коди» қаторига ёзилиб «Тасдиқлаш» тугмаси босилади. «Тасдиқлаш» тугмасини босишдан аввал ижарага олувчи талаба билан бирга турган бошқа талабаларни ҳам «Қўшиш» тугмаси орқали дастурга киритиш лозим.

Хабарга кўра, ижара шартномаларининг солиқ органида ҳисобга қўйилганлиги тўғрисидаги гувоҳномада талаба ва у билан бирга турувчи талабалар ҳақида маълумотлар ҳам шаклланади. Талабалар билан тузилган ижара шартномалари ҳисобга қўйилганда ушбу маълумотлар Олий ва ўрта махсус таълим вазирлиги базасида шаклланади. Бу эса ойлик ижара тўловининг бир қисмини қоплаб беришда олий ўқув юртларига қулайлик яратади.

Аввалроқ Ўзбекистонда иккиламчи ижара шартномасини электрон ҳисобга қўйиш имконияти яратилгани хабар қилинганди. Шунингдек, Ўзбекистонда 25 ёшгача бўлган ходимларга тўланган ижтимоий солиқ суммаси қандай қайтариб олиниши ҳақида хабар берилди.