Ўзбекистонда 1 мартдан бошлаб барча юридик шахслар цемент, цемент клинкери ва қурилиш ойнасини чекловларсиз экспорт қилиши мумкин. Бу бўйича Президент қарори қабул қилинди.

Президантининг «Уй-жойлар қурилишини ва қурилиш материаллари саноатини қўллаб-қувватлашнинг қўшимча чора-тадбирлари тўғрисида»ги қарори қабул қилинди.

Унга кўра, 2022 йил 1 мартдан бошлаб барча юридик шахсларга цемент,цемент клинкери ва қурилиш ойнасини чекловларсиз тўғридан-тўғри шартномалар асосида (квотасиз) экспорт қилишга рухсат берилади.

Шунингдек, 2024 йил 1 январьга қадар Экспортни ривожлантириш агентлиги томонидан маҳаллий экспорт қилувчи корхоналарга (уларнинг ваколатли вакилларига) қурилиш материалларини барча мамлакатларга, шу жумладан чегарадош давлатларга автомобиль, темир йўл ва ҳаво транспортида ташиш ҳаражатларининг 50 фоизигача миқдорини компенсация қилишга субсидиялар тақдим этилади.

Аввалроқ Ўзбекистонда цемент ишлаб чиқарувчиларнинг фойда солиғи ставкасини пасайтириш таклиф қилингани ҳақида хабар берилганди.