Ўзбекистондаги энг йирик цемент заводи — «Қизилқумцемент» корхонасининг устав капиталидаги 86,9 фоиз акциялар пакетини хусусийлаштиришга тайёрлаш жараёни бошланди. Бу ҳақда Давлат активларини бошқариш агентлиги ҳузуридаги UzAssets инвестиция компанияси матубот хизмати хабар берди.

Маълум қилинишича, Ўзбекистон Президентининг 2020 йил 27 октябрдаги «Давлат иштирокидаги корхоналарни ислоҳ қилишни жадаллаштириш ҳамда давлат активларини хусусийлаштиришга оид чора-тадбирлар тўғрисида»ги фармони доирасида «Қизилқумцемент» корхонаси устав капиталидаги 86,9 фоиз акциялар пакетини хусусийлаштиришга тайёрлаш ва тўлиқ хусусий секторга сотиш кўзда тутилган.

Фармонда белгиланган вазифалардан келиб чиқиб, Давлат активларини бошқариш агентлиги ҳузуридаги UzAssets инвестиция компанияси ва «Қизилқумцемент» томонидан корхона жорий ҳолатининг комплекс таҳлилини (due diligence) ўтказиш мақсадида Deloitte халқаро консалтинг компанияси маслаҳатчи сифатида жалб этилган.

Таҳлил натижаларига кўра, маслаҳатчи томонидан корхонанинг жорий ҳолати тўғрисида батафсил ҳисобот, шунингдек, корхонани хусусийлаштиришда эътиборга олиниши керак бўлган асосий омиллар бўйича бир қатор тавсиялар тайёрланган.

Хусусан, маслаҳатчи томонидан Ўзбекистон цемент бозорида катта ҳажмдаги янги ишлаб чиқариш қувватларининг ишга туширилиши билан боғлиқ рақобатнинг сезиларли даражада кескинлашуви қайд этилган. Шунингдек, корхона минтақанинг ижтимоий соҳаси учун муҳим аҳамият касб этиши таъкидланган.

Бундан ташқари, UzAssets инвестиция компанияси ва «Қизилқумцемент» томонидан корхонани баҳолаш учун Grant Thornton мустақил халқаро баҳолаш компанияси жалб қилинган. Корхонанинг, шу жумладан, давлатга тегишли бўлган акция пакетининг бозор қийматини баҳолаш бўйича ҳисобот тайёрланган.

Шу билан бирга, UzAssets томонидан, маслаҳатчи кўмагида корхонанинг устав капиталидаги улушни сотиб олиш бўйича келиб тушган таклифлар корхона фаолияти таҳлили жараёнида белгилаб олинган асосий мезонларга ва тармоқни стратегик ривожлантириш мақсадларига мувофиқлигини ўрганиш якунланмоқда. Ушбу жараённинг кейинги босқичлари тўғрисида маълумотлар яқин муддатларда расмий веб-сайт ва ОАВларда қўшимча равишда жойлаштирилади.

Аввалроқ Тошкентдаги Hyatt Regency меҳмонхонаси сотувга қўйилгани хабар қилинганди. Шунингдек, «Фарғонаазот»нинг 99 фоиз акция пакетининг хусусийлаштириш жараёни бошлангани ҳақида хабар берилди.