«Ўзсаноатқурилишбанк» Қўнғирот филиали биносининг фасадини реконструкция қилиш учун деярли 3 млрд сўм ажратилди
Тендерни ишончлилик даражаси 35 фоизга ҳам етмайдиган корхона 100 фоизлик натижа билан ютди
Ҳукумат ҳузуридаги жамғарма ва Молия вазирлиги таъсислигида бўлган «Ўзсаноатқурилишбанк» АТБ Қўнғирот филиали ўз биносининг фасадини реконструкция қилиш, кўкаламзорлаштириш ва тўсиқлар қуриш учун 29 октябрь куни тендер ўтказди.
Танлов якунига кўра, ғолиб «AGROTEXMASHSTROY» хусусий корхонаси ишни 2 миллиард 794 миллион сўмга бажаришга рози бўлган. Тендер ғолибига банк томонидан қўйидаги талаблар қўйилган:
- Камида 3 йиллик тажрибага эга бўлган қурилиш соҳасида олий маълумотли 1 кишидан иборат раҳбар сертификатланган қурилиш муҳандислари, камида 1 та ПТО мутахассиси бўлиши ва доимий ишлайдиган камида 20 та малакали ишчи мавжудлиги;
- лойиҳани амалга ошириш учун зарур бўлган машина ва механизмлар, моддий техник таъминот хизматининг мавжудлиги;
- танлов иштирокчилари ҳеч қандай давлат реестрларида яъни гаров реестрларида рўйхатда турмасликлари;
- танлов иштирокчилари давлат бюджетлари ҳамда бошқа ташкилотлардан қарзлари мутлақо бўлмаслиги;
- танлов иштирокчилари мавжуд ва олдинги харидлар бўйича мижоз билан салбий тажриба ишларига эга бўлмаслиги;
- шартномалар тузиш юзасидан фуқаролик — муомала ҳуқуқий лаёқат ва ваколатлар;
- КОНКУРС объектига ўхшаш объектларда ишлаш тажрибасининг мавжудлиги;
- ўз кучлари билан илгари бажарилган иш ҳажмлари тўғрисидаги маълумотлар;
- конкурс объектида ўз кучлари билан бажариладиган ишларнинг мўлжалланаётган ҳажми ( 50 фоиздан кам бўлмаган ҳолда).
Тендер протоколига кўра, «AGROTEXMASHSTROY» ушбу талабларга 100 фоиз жавоб берган. Қурилиш вазирлиги томонидан тузилган рейтингда ҳам худди шунга ўхшаш талаблар қўйилган, аммо унда ғолиб корхонага бўлган ишончлилик даражаси 35 фоиздан ҳам кам этиб белгиланган.
Қандай қилиб корхона тендердаги барча талабларга 100 фоиз жавоб бергани, шунингдек, бино фасади учун ажратилган деярли 3 миллиард сўмга айнан нималар сотиб олиниши номаълум.
