Одамлар пулим кўп бўлса, бахтли бўламан, ҳамма нарса сотиб оламан, деб ўйлайди. Лекин пулнинг ўзи бахт келтирмайди. Бу ҳақда бир қанча машҳур ресторанлар асосчиси Санжар Мақсудов Kommers.uz’га берган интервьюсида фикр билдирди.

«Пул нимага керак ўзи? Пулга мен ана у ердан қанақадир завқ сотиб оламан, дейсиз. Лекин у ҳам чегараланган нарса. Биттасини сотиб оласиз, кейин иккинчиси, учинчисини. Ундан кейин оладиган нарса йўқ. Кейингиси унақа завқ келтирмайди», — дейди у.

Ресторатор сўзида давом этар экан, фикрини мисол билан тўлдирди.

«Ўйлайсиз-ки машина олишим керак, машина олсам бахтли бўламан. Олганингизча. Олганингиздан кейин бир кун ҳайдайсиз ва 1 кун маза қиласиз. Эртаси куни бир хил бўлиб қолади», — дейди Мақсудов.

Kommers.uz суҳбатдошининг тушунтиришича, бахтни ишдан келадиган даромадга боғлаш нотўғри. Инсон шундай бир фаолият билан шуғулланиши керак-ки, ундан даромад келганда ёки муваффақиятга эришганда эмас, шунчаки иш жараёнининг ўзида бахтни ҳис қилсин.

«Ўзи кўпроқ эътибор бугунги кунда, аниқроғи сиз қилаётган ишнинг жараёнида бўлиши керак. Агар қилаётган ишингиз сизга завқ келтирмаса, завқни пулга сотиб оламан дейишингиз нотўғри бўлади», — дейди Мақсудов.

Суҳбатнинг тўлиқ вариантини Kommers.uz’нинг YouTube саҳифасида томоша қилишингиз мумкин.