«Қўқон биокимё» заводи устав капиталидаги 99,7 фоиз акциялар пакетини сотиб олиш бўйича таклифларни қабул қилиш муддати узайтирилди. Бу ҳақда Давлат активларини бошқариш агентлиги матбуот хизмати хабар берди.

Давлат активларини бошқариш агентлиги томонидан 2022 йил 7 январдаги эълонга мувофиқ, «Қўқон биокимё» акциядорлик жамияти устав капиталидаги 99,7 фоиз акциялар пакетини сотиб олиш бўйича таклифларни қабул қилиш муддати 2022 йил 15 март куни Тошкент вақти билан соат 18:00 га қадар узайтирилди.

Қайд этилишича, ушбу қўшимча муддат сотиш жараёнини янада шаффоф ва рақобатбардош ўтказиш, жараёнда қатнашиш учун Талабгорларга қўшимча имконият тақдим этишга қаратилган.

Аввалроқ «Қўқон биокимё» заводининг 99,7 фоиз акциялари сотилиши хабар қилинганди. Шунингдек, «Фарғонаазот» корхонаси устав капиталидаги 99,02 фоиз акция пакетларини хусусийлаштириш жараёнига қизиқиш билдириш бўйича таклифларни қабул қилиш муддатини узайтирилгани ҳақида хабар берилди.