Ўзбекистонда «Қўқон биокимё» заводининг 99,7 фоиз акциялари сотилади. Бу ҳақда Давлат активларини бошқариш агентлиги матбуот хизмати хабар берди.

Давлат активларини бошқариш агентлиги «Қўқон биокимё» корхонаси устав капиталидаги 99,7 фоиз акциялар пакетини музокараларга оммавий таклиф этиш орқали сотилишини маълум қилди.

Deloitte халқаро компанияси ушбу битим бўйича агентлик маслаҳатчиси вазифасини бажаради. UzAssets инвестиция компанияси агентлик манфаатлари учун ва унинг номидан битимга тайёргарлик жараёнини амалга оширади.

Қайд этилишича, «Қўқон биокимё» корхонаси 1983 йилда ташкил этилган. Заводнинг йиллик ишлаб чиқариш қуввати 4 миллион 020 минг декалитрни ташкил этиб, Ўзбекистондаги энг йирик этил спирти ишлаб чиқарувчиси ҳисобланади.

Шу билан бирга, «Қўқон биокимё» акциядорлик жамиятида ишлаб чиқарилган спирт органолептик хусусиятларига кўра Ўзбекистондаги энг яхшиларидан бири сифатида мутахассислар томонидан эътироф этиб келинади.

Таъкидланишича, компанияда спирт билан бир қаторда, қуввати йилига 5,36 минг тоннагача бўлган глютен тайёрлаш бўйича янги линия ишга туширилган. Компания даромадлар ўсишининг юқори суръатларини намойиш этмоқда, рентабеллик эса бозор даражасида.

Аввалроқ «Ўзгазлойиҳа»нинг 63,4 фоиз акцияси сотилиши хабар қилинганди. Шунингдек, Ўзбекистондаги энг йирик цемент заводининг 86,9 фоиз акцияси сотилиши ҳақида хабар берилди.