«Қозоғистон темир йўллари» Назарбоевнинг қизига қарашли компания билан шартномани муддатидан олдин бекор қилди
Шартнома йил охиригача амал қилиши керак эди.
Қозоғистон миллий темир йўл компанияси Алия Назарбоевага тегишли компания билан чипта сотиш бўйича шартномани муддатидан олдин бекор қилди. Бу ҳақда миллий темир йўл компанияси матбуот хизмати хабар берди.
Маълум қилинишича, миллий темир йўл ташувчиси «Қазақстан темір жолы» АЖ ва Instant Payments МЧЖ ўртасида йўловчи поездлари учун электрон йўл ҳужжатларини бериш ва сотиш бўйича шартнома муддатидан олдин бекор қилинган.
«Миллий компания бу хизматларни ўзи кўрсатади. Саёҳат ҳужжатлари одатдаги тартибда bilet.railways.kz сайти, чипта кассалари ва онлайн хизматлар орқали расмийлаштирилади. Шу билан бирга, хизматдан фойдаланиш барчага бозор иштирокчилари очиқлик ва ошкоралик тамойиллари асосида тақдим этилади», дейилади хабарда.
Таъкидланишича, Instant Payments тўлов компанияси билан шартнома 2014 йилда тузилган бўлиб, 2023 йил охиригача амал қилиши керак эди. Хабарларга кўра, компания Қозоғистон биринчи президентининг кенжа қизи Алия Назарбоевага тегишли.
Аввалроқ Назарбоевнинг куёви «Газпром» директорлар кенгашига номзодлар рўйхатидан йўқолиб қолгани хабар қилинганди. Шунингдек, Назарбоевнинг қизига алоқадор компания утилизация тўловини йиғишдан маҳрум қилингани ҳақида хабар берилди.