Дунёнинг машҳур брендлари Ўзбекистонга таклиф этилади. Бу ҳақда 2022–2026 йилларга мўлжалланган тараққиёт стратегиясини 2022 йилда амалга ошириш бўйича «йўл харитаси» лойиҳасида сўз боради.

Маълум қилинишича, Ўзбекистонда дунёнинг машҳур H&M (Швеция), ZARA (Испания), LC Waikiki (Туркия), PUMA (Германия), Reebok (Буюк Британия), Uniqlo (Япония) каби брендлари ҳамкорлигида экспортбоп маҳсулотлар ишлаб чиқариш йўлга қўйилади.

Қайд этилишича, Adidas (Германия), Bogner (Германия), Bata (Швейцария), Geox (Италия), Diadora (Италия), Pakerson (Италия), Sasha Fabiani (Хитой) каби дунёга машҳур пойабзал бренди буюртмаларини жалб этиш ҳисобига 130 миллион долларлик оёқ кийимлар экспорти таъминланади.

Бундан ташқари, бренд эгалари Ўзбекистонга таклиф этилиб, тайёр маҳсулот экспортчи корхоналари билан ҳамкорлик ўрнатилади. Шунингдек, тайёр маҳсулот ишлаб чиқарувчиларини хорижий мутахассисларни жалб қилган ҳолда ўқитиш режалаштирилган.

Аввалроқ Самарқандда Volkswagen ва Skoda дилерлик марказлари очилгани хабар қилинганди.