Ўзбекистон январь-октябрь ойларида 12 та хорижий давлатга лимон экспорт қилган. Бу ҳақда Давлат статистика қўмитаси хабар берди.

Маълумотларга кўра, Ўзбекистон 2021 йилнинг 10 ойида 12 та хорижий давлатга қиймати 3,8 миллион долларга тенг бўлган 3,7 минг тонна лимон экспорт қилган. Шунингдек, лимон экспорти 2020 йилнинг мос даври билан солиштирилганда 2,4 минг тоннага камайган.

Қайд этилишича, Ўзбекистон энг кўп лимон экспорт қилган давлатлар қуйидагича:

1. Россия — 2,2 минг тонна;
2. Қозоғистон — 1,2 минг тонна;
3. Қирғизистон — 380 тонна;
4. Украина — 2,4 тонна;
5. Афғонистон — 2,2 тонна.

Шу билан бирга, хорижга энг кўп лимон экспорт қилган ҳудудлар:

1. Тошкент вилояти — 1,2 минг тонна;
2. Фарғона вилояти — 984 тонна;
3. Наманган вилояти — 249 тонна;
4. Бухоро вилояти — 210 тонна.

Аввалроқ Шавкат Мирзиёев мева-сабзавот экспорти 5 миллиард долларга етказилишини айтгани хабар қилинганди. Шунингдек, Ўзбекистон энг кўп мева-сабзавот экспорт қилган давлатлар ҳақида хабар берилди.