Рейтинг. Ўзбекистон энг кўп оёқ кийим экспорт қилаётган 5 та давлат
Экспорт ҳажми 2020 йилнинг январь-ноябрь ойларига нисбатан 517 минг долларга камайган.

Ўзбекистон 2021 йилнинг 11 ойида 15 та давлатга оёқ кийим экспорт қилди. Бу ҳақда Давлат статистика қўмитаси матбуот хизмати хабар берди.
Маълумотларга кўра, Ўзбекистон 2021 йилнинг январь-ноябрь ойларида 15 та хорижий давлатга қиймати 34 миллион долларга тенг бўлган оёқ кийимлар экспорт қилган. Шунингдек, оёқ кийим экспорти 2020 йилнинг мос даврига нисбатан 517 минг долларга кам.
Қайд этилишича, 2021 йилнинг 11 ойида Ўзбекистон энг кўп оёқ кийим экспорт қилган давлатлар:
- Қирғизистон — 19,1 миллион доллар;
- Қозоғистон — 7,7 миллион доллар;
- Тожикистон — 5,3 миллион доллар;
- Россия — 925 минг доллар;
- Афғонистон — 631 минг доллар.
Бундан ташқари, 2021 йилнинг 11 ойида хорижий давлатларга энг кўп оёқ кийим экспорт қилган ҳудудлар:
- Андижон вилояти — 15,1 миллион доллар;
- Самарқанд вилояти — 7,1 миллион доллар;
- Фарғона вилояти — 6,6 миллион доллар;
- Тошкент вилояти — 2,3 миллион доллар;
- Наманган вилояти — 1,1 миллион доллар;
- Хоразм вилояти — 1,1 миллион доллар.
Аввалроқ Ўзбекистонда чарм-пойабзал соҳасида қандай ўзгаришлар кутилаётгани хабар қилинганди. Шунингдек, Reebok, ZARA ва Adidas каби бренд эгалари Ўзбекистонга таклиф этилиши ҳақида хабар берилди.






