2021 йил сентябрь ва октябрь ойларида Apple Хитойда юзага келган етказиб бериш занжири муаммолари ва электр таъминотидаги чекловлар туфайли iPhone 13’ни режалаштирилганидан 20 фоиз камроқ ишлаб чиқарди. Бу ҳақда Nikkei хабар берди.

Қайд этилишича, Хитойда октябрь ойи бошида бир қатор заводларда iPhone ва iPad’нинг ишлаб чиқарилиши бутунлай тўхтаган. Заводларнинг тўхтаб қолиши байрам мавсуми олдидан тўлиқ қувватда ишлаш керак бўлган даврда содир бўлган.

«Компонентлар ва микросхемалар сони чекланганлиги сабабли байрам кунларида қайта ишлаш ва ишчиларга қўшимча ҳақ тўлаш мантиққа тўғри келмасди», — дейди таъминот тармоғи раҳбарларидан бири.

Хабарга кўра, коронавирус билан боғлиқ чекловлар туфайли Вьетнам ва Малайзияда жойлашган бутловчи заводлардаги узилишлар ҳам ишлаб чиқаришга таъсир кўрсатган.

Узилишлар ортидан Apple сентябрь ойида бир неча миллион янги гаджетларни ишлаб чиқармаган ва миллиардлаб доллар даромадни йўқотган.

Маълумот ўрнида, компания 2021 йилда 230 миллион iPhone ишлаб чиқаришни мақсад қилган, бироқ ишлаб чиқарилган қурилмаларнинг ҳақиқий сони тахминан 15 миллион донага кам бўлади.

Ноябрь ойида янги қурилмаларни ишлаб чиқариш суръати тикланган, аммо iPhone ва iPad’ларнинг эски моделларини ишлаб чиқариш ҳажми сезиларли даражада камайган, чунки чекланган миқдордаги компонентларни янги гаджетлар учун сарфлашга қарор қилинган.

Nikkei октябрь ойида Apple яримўтказгич компонентларининг доимий тақчиллиги сабабли, 2021 йилда iPhone 13 ишлаб чиқаришни 10 миллион донагача камайтиришини прогноз қилганди.

Аввалроқ Apple Исроил компаниясини хакерлик қилгани учун судга бергани ҳақида хабар берилганди.