Тан олинмаган Донецк Халқ Республикаси аҳолисининг Россияга оммавий равишда кўчирилиши ҳақида хабарлар тарқала бошлагач рубль курси кескин пасайишни бошлади. 18 февраль ва 19 февраль оралиғида рубь долларга нисбатан 1,33 фоизга қадрсизланиб, 1 доллар 77,3 рублга баҳоланмоқда.

Донецк раҳбари Пушилиннинг маълум қилишича, фуқаролар Ростов вилоятига Россия раҳбарияти билан келишилган ҳолда жойлаштирилади.

«Душманнинг қуролли кучлари жанговар таркибда ва Донбассни куч билан босиб олишга тайёр. Украина Президенти Владимир Зеленский тез орада ҳарбийларга ҳужумга ўтиш, Донецк ва Луганск Халқ Республикалари ҳудудига бостириб кириш режасини амалга ошириш ҳақида буйруқ беради», — дейди Пушилин.

Шунингдек, 18 февраль куни Москва биржаси индекси 2,6 фоизга тушиб, 3419,96 пунктни ташкил қилди. Буни Москва биржасидаги савдо маълумотлари тасдиқлайди. Россия бенчмарки 14 февралдан бошлаб минимал даражага тушди.

Россия бозоридаги пасайиш Президент Владимир Путин бошчилигида 19 февраль куни стратегик тўхтатувчи кучларнинг машғулотлари ўтказилиши, машғулот давомида баллистик ва қанотли ракеталар қўлланиши ҳақидаги хабарлар пайдо бўлгач қайд этилди.

Маълумот учун, айни вақтда Украина ва Россия чегарасида кескин ҳарбий ҳолат сақланиб қолмоқда. Икки давлат муносабатларининг бу даражада совуқлашиши 2013 йилга бориб тақалади. Зиддиятга Россия билан бевосита умумий чегарага эга бўлган Украинанинг Ғарбга яқинлашиши ҳамда НАТО ва Европа Иттифоқи каби ташкилотлар аъзосига айланиш хавфи сабаб бўлган.

Тан олинмаган Донецк ва Луганск Халқ Республикалари Донбасс деб аталмиш регионда, Украина ва Россия ўртасида жойлашган. Улар аввал Украина таркибига кирувчи мамлакатнинг шарқида жойлашган Донецк ва Луганск вилоятлари ҳисобланган. Бироқ 2013 йилда Украинада бошланган сиёсий инқироздан сўнг, ушбу вилоятлар Россиянинг «кўмагида» мустақил республикага айланган.

Ҳозирда айни ушбу ҳудудда ҳарбий ҳаракатлар кетаётгани ҳақида хабарлар тарқалмоқда. Рус нашрлари Украина тан олинмаган Донецк ва Луганск республикалари ҳудудини ўққа тутаётгани ҳақида ёзмоқда.

Аввалроқ Россия ва Украина ўртасидаги кескинлик фонида биткоин нархи тушиб кетгани хабар қилинганди.