Россияда Facebook ижтимоий тармоғи (Meta Platforms Inc’га тегишли)дан фойдаланиш 25 февралдан қисман чекланди. Бу ҳақда «Роскомнадзор» матбуот хизмати хабар берди.

«Бош прокуратуранинг Facebook ижтимоий тармоғига оид қарорига мувофиқ, 2022 йил 25 февралдан бошлаб «Роскомнадзор» қонунга мувофиқ киришни қисман чеклаш чораларини кўрмоқда», дейилади «Роскомнадзор» хабарида.

Департаментнинг таъкидлашича, чекловлар киритилиши Россия оммавий ахборот воситаларининг расмий аккаунтларидаги чеклов билан боғлиқ бўлиб, бу Россия қонунчилигига зиддир.

«Роскомнадзор» Meta томонидан Россия ОАВлари, жумладан, «Звезда» телеканали, «РИА Новости» агентлиги, «Лента.ру» ва «Газета.ру» сайтларига нисбатан чекловларни олиб ташлашни ва уларнинг киритилиш сабабларини тушунтиришни талаб қилди. Бироқ компания бу талабларни эътиборсиз қолдирди.

Натижада, Россия Бош прокуратураси Ташқи ишлар вазирлиги билан келишилган ҳолда ижтимоий тармоқни инсон ҳамда Россия фуқароларининг асосий ҳуқуқ ва эркинликларини бузишга алоқадор деб тан олди.

Аввалроқ Meta ўз платформаларида ёлғон ахборотга қарши курашиш учун экспертлар бирлашмасини тузиши хабар қилинганди. Шунингдек, Apple Россия банкларининг иловаларини блоклашни бошлагани ҳақида хабар берилди.